20 августга ўтар кечаси ва пайшанба тонгида Россия томонидан амалга оширилган ракета зарбалари оқибатида пойтахт Киев ва унинг атрофидаги ҳудудларда камида 12 киши ҳалок бўлди.
Украина фавқулодда хизматларига кўра, тунги «йирик ҳужум» нишонида кўп қаватли турар-жой бинолари ва омборхоналар бўлган. Зарбалар оқибатида камида 33 киши жароҳатланган.
Киев мери Виталий Кличконинг айтишича, Соломянский туманида ёнғин келиб чиққан ва тўққиз қаватли турар-жой биносининг юқори қаватлари вайрон бўлган. У ерда етти киши ҳалок бўлган. У жума кунини мотам куни деб эълон қилишга чақирди.
Тунда берилган зарбалар оқибатида нотураржой объектлари, омборхоналар, мактаб ва болалар шифохонаси зиён кўрган. Шифохонанинг деразалари цинган ва яқин атрофдаги автомобиллар ёниб кетган.
Мернинг қўшимча қилишича, Соломянский туманидаги саноат марказига ҳам ракеталар келиб тушган.
Давлат энергетика компанияси ҳужум оқибатида электрсиз қолган 90 мингга яқин хонадоннинг ярмидан кўпига электр энергияси қайта тикланганини билдирди.
Украина фавқулодда вазиятлар хизмати ходимлари ёнғин билан курашаётгани ва вайрон бўлган объектлардан одамларни қутқараётгани акс этган видеони намойиш этди.
Reuters гувоҳининг хабар беришича, у ўндан ортиқ портлаш овозини эшитган.
Киев вилоятининг Бровари туманига уюштирилган ҳужумда эса бир киши ҳалок бўлган ва яна бир киши жароҳатланган.
