Халқаро футбол федерацияси (ФИФА) интизом қўмитаси Жаҳон чемпионати — 2026 якунлари бўйича Аргентина футбол ассоциациясини (АФА) 321 минг доллар миқдорида жаримага тортди. Бу ҳақда ФИФА матбуот хизмати хабар бермоқда.
Санкциялар ФИФА Интизом кодексининг тўртта моддасини бузганлик учун қўлланилган:
Спорт тадбиридан спортга алоқадор бўлмаган намойишлар учун фойдаланиш;
Жамоанинг номақбул хатти-ҳаракати;
Дискриминация ва ирқчиликка оид ҳақоратлар;
Ўйинлардаги тартиб ва хавфсизлик.
Бундан ташқари, АФА кейинги иккита уй ўйинини чекланган миқдордаги томошабинлар билан (стадион сиғимининг 50 фоизидан кўп бўлмаган) ўтказиши шарт. Жарима суммасининг 100 минг доллари дискриминацияга қарши кураш дастурига йўналтирилиши лозим. Санкцияларнинг бир қисми — битта ўйин ва 100 минг доллар жарима — синов муддати билан кечиктирилди.
ЖЧ-2026 яримфиналида Англия устидан қозонилган ғалабадан сўнг, аргентиналик футболчилар «Las Malvinas son Argentinas» (Малвин ороллари — Аргентинага тегишли) ёзувли баннерни ёйишди — бу сиёсий намойиш сифатида баҳоланди.
Фолкленд ороллари (Аргентинада уларни Малвин ороллари деб аташади) атрофидаги можаро XX асрдан бери давом этиб келади. 1982 йилда Буюк Британия ва Аргентина ўртасида ушбу архипелаг учун уруш бўлиб ўтди ва бунинг оқибатида 649 нафар аргентиналик ва 255 нафар британиялик ҳарбий хизматчи ҳалок бўлди. Ороллар британияликлар назорати остида қолди.
Интизом қўмитаси, шунингдек, финал ўйинидан кейинги жанжал туфайли Леандро Паредес, Науэл Молина, Тиаго Алмада ва Роберто Айала (барчаси — Аргентина) ҳамда Гавига (Испания) нисбатан санкциялар қўллади.
Жанжал Молинанинг испанлар сардори Родрига зарба бериши билан бошланди. Шундан сўнг Паредес испанлар ҳимоячиси Эрик Гарсиянинг бўйнидан бўғди, Гавини итариб юборди. Футболчиларни жамоадошлари ажратиб қўйишди. Аргентина миллий жамоаси мураббийлар штаби аъзоси Роберто Айала эса испаниялик яримҳимоячи Дани Олмога зарба беришга уринди.
Энг оғир жазо Паредесга тайинланди — яримҳимоячи миллий жамоа сафидаги 10 та ўйиндан четлатилди ва 90 минг доллар миқдорида жаримага тортилди. Молина 7 ўйинга дисквалификация қилинди ва у ҳам 90 минг доллар жаримага тортилди. Мураббий Айала 3 та ўйиндан четлатилди ва 30 минг доллар жаримага тортилди. Алмада ва Гави биттадан ўйинга дисквалификация қилинди ва уларнинг ҳар бири 30 минг доллардан жаримага тортилди.
Эслатиб ўтамиз, ЖЧ-2026 финали Испаниянинг Аргентина устидан 1:0 ҳисобидаги ғалабаси билан якунланди. Ягона голни қўшимча вақтларда Ферран Торрес урди, натижада Испания тарихда иккинчи марта жаҳон чемпиони бўлди.
