Jetour Хитойнинг Ченду шаҳридаги автосалонда янги Traveller 7 йўлтанламасини тақдим этди. Autohome нашрининг ёзишича, айни пайтда автомобил учун олдиндан буюртмалар очилган. Банд қилиш учун 777 юан (тахминан 800 минг сўм) тўлаш талаб этилади.
Дизайндаги асосий ўзига хослик — ёрқин чизиқ билан бирлаштирилган думалоқ диодли кундузги чироқларга эга ғайриоддий олд оптикадир. Умуман олганда, модел услуби автосаноатда «тўртбурчак» кузовлар трендини бошлаб берган Британиянинг Land Rover Defender моделини ёдга солади.
Автомобил бўртма капот ва тўртбурчак шаклидаги массив ҳаво ютгич билан безатилган. Traveller 7 томининг улкан рейлинглари орасидан панорамали люк ўрин олган.
Қизиғи шундаки, тизер суратларда автомобилнинг юкхона эшигига «йўлтанламас» кофери ўрнатилган эди. Бироқ «жонли» нусханинг орқа қисмида оддий захира ғилдираги кўзга ташланади.
Интерьер T2 йўлтанламаси билан ягона концепцияда яратилган: ихчам рақамли асбоблар панели, ҳаракатланиш режимларини ўзгартириш учун мўлжалланган шайба, симсиз қувватлаш мосламаси, орқа кўриниш камераси ва катта мултимедиа-кўнгилочар тизими экрани. Шуниси эътиборга лойиқки, салонда анча-мунча жисмоний тугмалар ва «эски услубдаги» созлагичлар сақлаб қолинган.
Модел Хитойда икки литрли бензин двигатели билан сотувга чиқарилади. Агрегат саккиз поғонали «автомат» узатмалар қутиси билан биргаликда ишлайди. Уланма — тўлиқ. Шунингдек, таркибида 1,5 литрли двигател ва учта электромотор бўлган, қуввати 781 от кучига тенг гибрид версияси ҳам мавжуд. Умумий юриш масофаси — 1,4 минг км.
