Путин «Россия Федерациясининг муҳим инфратузилма объектлари хавфсизлигини таъминлаш чора-тадбирлари тўғрисида»ги 604-сонли тегишли фармонни 24 август куни имзолади. Ҳужжат ҳуқуқий ахборот расмий порталида эълон қилинди ва кучга кирди.
Вақтинчалик бошқарувни жорий этишга хавфсизлик чораларини кўрмаслик ёки ўз вақтида кўрмаслик, белгиланган талабларни бузиш, объектнинг нормал ишлашига таҳдид яратиш ёки ҳатто шикастлангандан сўнг уни тиклашни кечиктириш асос бўлиши мумкин. Фармонда, шунингдек, дронлар ҳужумларининг олдини олишга қаратилган «чора-тадбирларни амалга ошириш самарасизлиги» алоҳида таъкидланган.
Ҳукумат вақтинчалик бошқарувга компаниянинг барча ёки бир қисм кўчар ва кўчмас мулкини, унга тегишли қимматли қоғозлар ва Россия юридик шахсларидаги улушларни, шунингдек, мулкий ҳуқуқларни ўтказиши мумкин. Қарорни ҳукумат Путиннинг топшириғига кўра қабул қилади.
«Росимущество» вақтинчалик бошқарувчи бўлади, бироқ ҳукумат бошқа ташкилотни тайинлаши ҳам мумкин. Бошқарувчи топширилган мол-мулкни тасарруф этиш ҳуқуқидан ташқари, мулкдорнинг барча ваколатларини қўлга киритади. Вақтинчалик бошқарув муддати фармонда чекланмаган: уни ҳам президент топшириғига биноан ҳукумат бекор қилиши мумкин.
Фармонда «муҳим инфратузилма объектлари» сирасига ёқилғи-энергетика мажмуаси ва саноат корхоналари, алоқа, коммунал, транспорт ва логистика инфратузилмаси, энергетика, шу жумладан атом энергетикаси ҳамда ҳаётий таъминот объектлари киритилган. Шу билан бирга, рўйхат очиқлигича қолмоқда: бу механизм ҳукумат Россия хавфсизлиги, иқтисодий барқарорлиги ёки аҳоли ҳаёти учун «ўта муҳим аҳамиятга эга» деб ҳисоблайдиган бошқа объектларга ҳам қўлланилиши мумкин.
Фармон Украина томонидан Россиянинг саноат ва логистика инфратузилмасига қилинаётган ҳужумлар сони кескин ортиши фонида пайдо бўлди. Нефтни қайта ишлаш заводлари (НҚИЗ) 2024 йил бошиданоқ Украина дронларининг доимий нишонига айланган, 2025 йилда эса зарбалар шиддати янада ошган. 2026 йилда Украина кампания кўламини сезиларли даражада кенгайтирди: биринчи ярим йилликнинг ўзида Украина дронлари заводларга камида 194 марта муваффақиятли ҳужум қилган — бу 2025 йилнинг шу даврига нисбатан 11 баробар кўпдир. Ҳужумлардан сўнг айрим НҚИЗ узоқ вақт давомида нефтни қайта ишлашни қисқартирди ёки бутунлай тўхтатди, баъзи заводлар эса ҳафталаб нормал иш фаолиятига қайта олмади.
