Россия жанговар ҳаракатларни давом эттиришга ваъда бераётганига қарамай, Украина АҚШ ва европалик ҳамкорлари билан биргаликда урушни тўхтатиш бўйича бир қатор таклифлар ишлаб чиқди. The Times нашрининг ёзишича, бу ҳақда 23 август куни Украина президенти Володимир Зеленский маълум қилган.
Унинг сўзларига кўра, Киев ушбу режа устида АҚШ президенти Доналд Трамп вакиллари ва Европа расмийлари билан бирга ишлаган. Режа ўт очишни тўхтатишни, Россия ва Украина қўшинларини фронт чизиғидан ўзаро олиб чиқиб кетишни ҳамда буфер ҳудуд яратишни кўзда тутади.
«Бизга маълум бўлишича, Америка томонида яна бир нечта ғоя бор. Улар бу ғояларни тақдим этиш учун қулай фурсат топмоқчи. Биз уларни кутмоқдамиз», – деб қўшимча қилди Зеленский.
Нашр маълумотларига кўра, 24 август куни Россияга Ватикан дипломати Пол Ричард Галлаҳер ташриф буюрган ва ушбу таклифларни етказиши мумкинлиги тахмин қилинмоқда. 25 август куни у Россия ташқи ишлар вазири Сергей Лавров билан учрашиши режалаштирилган.
Бироқ, журналистлар таъкидлаганидек, Россия илгари ҳам бундай таклифларни рад этган, шу сабабли музокараларда жиддий натижага эришиш умиди пастлигича қолмоқда.
Яқинда Россия ташқи ишлар вазири Сергей Лавров Россия урушни ҳозирги фронт чизиғи бўйлаб тўхтатишга рози бўлмаслигини айтган. Унинг сўзларига кўра, бу «нацизмни енгган боболар» жасоратини қадрсизлантирган бўларди. У жанговар ҳаракатларни тўхтатишга фақат «узоқ муддатли, ишончли ва барқарор келишув» шарти билангина эришиш мумкинлигини қўшимча қилган.
