Ўзбекистон мудофаа вазири Шуҳрат Ғайратжонович Холмуҳамедов лавозимидан озод этилди. Президент матбуот хизматига кўра, у бошқа ишга ўтказилган.
У бу лавозимда 2024 йил ноябридан буён ишлаб келаётганди.
Унинг ўрнига Ботир Баҳромович Қудратхўжаев янги мудофаа вазири сифатида иш бошламоқда. Унинг номзоди Олий Мажлис Қонунчилик палатаси депутатлари томонидан маъқулланди.
Ботир Қудратхўжаев 1975 йилда туғилган, 1997 йилда Тошкент давлат юридик институтини тамомлаган.
У ўз фаолиятини ҳарбий прокуратурада бошлаган, турли йилларда Тошкент вилояти ҳарбий прокурори, Шарқий ҳарбий округ ҳарбий прокурори, Ўзбекистон ҳарбий прокурорининг биринчи ўринбосари вазифаларида ишлаган.
Кейинроқ Сурхондарё вилояти прокурори (2014-2016), Тошкент шаҳри прокурори (2016-2017), Бош прокуратура ҳузуридаги Мажбурий ижро бюроси директори (2017-2020), Хоразм вилояти прокурори (2020-2022), Бош прокурорнинг биринчи ўринбосари – ҳарбий прокурор (2022-2025) лавозимларида фаолият кўрсатган. 2025 йил февралидан Фавқулодда вазиятлар вазирлигига раҳбар бўлган ва генерал-майор унвонини олган, 2026 йил январида Ички ишлар вазирининг биринчи ўринбосари – Тезкор қидирув департаменти бошлиғи лавозимига тайинланганди.
