Агар Владимир Путин 60 кунлик сулҳга рози бўлса, Украинада сайловлар ўтказилади, деди Володимир Зеленский ABC News журналисти Жонатан Карлга берган интервюсида.
Зеленский АҚШ президентининг Украинага янги етакчи кераклиги ҳақидаги сўзларига муносабат билдириб, қачон сайлов ўтказиш ва кимни сайлашни украинларнинг ўзи ҳал қилиши кераклигини таъкидлаган.
«Президентнинг сўзларига келсак... У биз янги сайловлар ўтказишимиз кераклигини айтди. Ҳа, шунга ўхшаш гап. Президент Трамп айтдики, бизга – Украинага – янги президент керак. Президент Трампга ҳурматни сақлаган ҳолда айтаманки, етакчини сайлаш – бу бизнинг жамиятимизнинг, халқимизнинг ишидир. Ҳа, биз уруш ҳолатидамиз ва сайловлар ўтказиш чиндан ҳам жуда қийин», – деган Зеленский ABC эфирида.
У гап фақат Украина қонунчилиги уруш даврида сайловлар ўтказишни тақиқлашида эмаслиги, балки ҳозирда одамларга овоз бериш имкониятини берадиган хавфсизлик инфратузилмаси ҳам йўқлигини таъкидлаган.
«Агар президент Трамп чиндан ҳам сайловлар орқали ўзгаришлар бўлишини хоҳласа – мен бу ҳақда унинг жамоасига ҳам айтганман – улар Путинга етказишсин: бизга икки ой, нафас ростлаш учун 60 кун муҳлат берилсин. Ўт очиш 60 кунга тўлиқ тўхтатилсин – ва биз сайловларни ташкиллаштирамиз. Албатта, биз халқимизнинг – айнан украин халқининг ҳар қандай танловини қабул қилишга тайёр бўламиз», – дейди Зеленский.
Бир кун олдин Трамп журналистлар билан мулоқотда Украинага «келишув туза оладиган янги президент сайлаш»ни таклиф қилганди. «Биласизми, нима таклиф қиламан? Мен уларга [украинларга] келишувлар туза оладиган янги етакчи топишни таклиф қиламан – ахир у [Володимир Зеленский] кўплаб битимлар тузиши мумкин эди, бироқ негадир буни ҳеч қачон қилмади», – деганди Трамп.
У Зеленскийни Россия нефтни қайта ишлаш заводлари бўйлаб берилаётган зарбалар учун танқид қилган. Трампнинг сўзларига кўра, АҚШ томони Зеленскийга «Россия билан истаганини қилиши мумкинлиги»ни, аммо нефтни қайта ишлаш заводларига зарба бермаслик кераклигини, чунки бу «глобал муаммо» эканини маълум қилган. Кейинги куни эса Зеленский агар Россия Украина энергетика инфратузилмаси бўйлаб зарбалар беришни тўхтатадиган бўлса, украин ҳарбийлари ҳам Россиядаги нефтни қайта ишлаш заводларига ҳужумларни бас қилишини ваъда қилди.
