Запорижжя вилояти ҳарбий маъмурияти раҳбари Иван Федоровнинг маълум қилишича, 25 август эрта тонгда Запорижжяга бошқариладиган авиабомбалар билан зарба берилган. Оқибатда икки киши ҳалок бўлган.
Ҳужум натижасида автомобил йўлининг қатнов қисмига зарар етган ва очиқ ҳудудда ёнғин чиққан.
Бундан аввал, 24 август кечқурун шаҳарга дронлар билан зарба берилган. Ҳужум оқибатида кўп қаватли уй зарар кўрган ва хонадонлардан бирида ёнғин чиққан.
Харьковда эса ракета зарбаси оқибатида бир киши ҳалок бўлган. Шаҳар мэри Игор Тереховга кўра, зарба Харкив жанубидаги Основянский тумани саноат ҳудудига берилган.
Шунингдек, Харкивнинг Киевский туманига ҳам учувчисиз қурилмалар билан ҳужум қилингани маълум қилинди.
Киевнинг Голосеевский туманида дрон парчаларининг 16 қаватли турар жой биносига тушиши оқибатида деворлар зарар кўрган ва деразалар синган. Шаҳар мэри Виталий Кличконинг маълум қилишича, бир аёл жабрланган.
Днепр шаҳрида ҳам зарбалар қайд этилган. Украина ОАВнинг дастлабки маълумотларига кўра, йирик «Караван» савдо-кўнгилочар маркази яқинида зарба тушган ва ёнғин чиққан.
Чернихив вилоятининг Корюковский туманида эса корхоналардан бири ҳужумга учраган. Украина Давлат фавқулодда вазиятлар хизмати маълумотларига кўра, натижада 3 минг квадрат метрдан ортиқ майдонда ёнғин юзага келган.
Йўл ва ўрмон хўжалиги объектлари, шунингдек, хусусий корхоналар ҳудудида ҳам ёнғинлар қайд этилган. Улар ўчирилган, жабрланганлар ҳақида маълумот берилмаган.
Молдова чегарасидаги назорат пунктига зарба
Украина Давлат чегара хизмати Молдова билан чегарадаги назорат-ўтказиш пунктларидан бирига яна ҳужум қилинганини маълум қилди.
Хабарга кўра, Shahed дронлари «Виноградовка» автомобил назорат-ўтказиш пунктига зарба берган. Оқибатда у ерда ёнғин чиққан ва пункт фаолияти вақтинча тўхтатилган.
Фуқаролар бошқа назорат-ўтказиш пунктларига йўналтирилиши айтилган.
Қизил Хочнинг гуманитар омбори ҳам зарар кўрди
24 август кечқурун Қизил Хоч матбуот хизмати Херсондаги ташкилот омборига Россия дронлари билан ҳужум қилинганини билдирди.
