Қозоғистон президенти Қосим-Жўмарт Тўқаев яқин сафдоши Ерлан Каринни мамлакат вице-президенти этиб тайинлади. Бу лавозим Қозоғистоннинг 2026 йилда қабул қилинган янги Конституцияси асосида жорий этилган.
31 август куни Астанада янги сайланган Қурултойнинг ялпи мажлисида Тўқаев Ерлан Карин номзодини вице-президентликка илгари сурди. Парламентнинг 145 нафар аъзосидан 141 нафари унинг номзодини қўллаб-қувватлади. Шундан кейин президент тегишли фармонни имзолади.
50 ёшли Ерлан Карин 2019 йилдан буён Тўқаевнинг ёрдамчиси, давлат котиби ва давлат маслаҳатчиси лавозимларида ишлаган. 2026 йил 30 июнда Қозоғистон президенти администрацияси раҳбарининг биринчи ўринбосари этиб тайинланган эди.
15 март кунги референдум асосида Конституцияга киритилган ва 1 июлдан кучга кирган ўзгаришларга кўра, Қозоғистонда Сенат тугатилиб, бир палатали парламент ташкил этилди, шунингдек, вице-президент лавозими қайта жорий этилди.
Вице-президент Қурултой билан келишган ҳолда президент томонидан лавозимга тайинланади. Вице-президент парламент, ҳукумат ва бошқа давлат органлари билан муносабатларда давлат раҳбарини тамсил қилиш ваколатига эга. Президент муддатидан олдин лавозимидан озод этилган тақдирда, унинг ваколатлари вице-президентга ўтади.
Маълумот учун, Қозоғистонда 1990-1995 йилларда ҳам вице-президент лавозими бўлган.
