Skovsporet лойиҳаси SAGA Space Architects архитектура бюроси томонидан 3DCP ва COBOD компаниялари билан ҳамкорликда ишлаб чиқилган. Мажмуа Холстебро шаҳрида жойлашган бўлиб, маҳаллий университет кампуси учун ҳамёнбоп турар жойлар қуриш билан шуғулланувчи ташкилот буюртмаси асосида барпо этилган.
Мажмуа олтита бир қаватли бинодан иборат бўлиб, уларда жами 36 та квартира жойлашган. Бинолар орасида ички ҳовлилар, кўкаламзор боғлар, пиёдалар йўлаклари ва велосипедлар учун турар жойлар ташкил этилган.
Қурилишда атроф-муҳитга таъсирни камайтиришга ҳам алоҳида эътибор қаратилган. Хусусан, қурилиш майдонида аввалдан ўсиб турган дарахтларнинг 90 фоизини сақлаб қолишга муваффақ бўлинган.
Биноларнинг асосий деворлари COBOD BOD3 3D-принтери ёрдамида қурилган. У махсус цементга ўхшаш қоришмани сопло орқали қатламма-қатлам чиқариб, квартираларнинг асосий деворларини шакллантирган.
Қурилиш майдонида 3D-босма жараёнини назорат қилиш учун атиги уч киши етарли бўлган. Мутахассислар тажриба орттиргани сари қурилиш тезлиги ҳам сезиларли даражада ошган.
Масалан, олтита квартирадан иборат биринчи бинони 3D-принтерда босиб чиқариш учун бир неча ҳафта талаб қилинган бўлса, худди шундай ҳажмдаги сўнгги бино атиги беш кунда босиб чиқарилган.
Бироқ мажмуа тўлиқ 3D-принтерда тайёрланмаган. Деворларни босиб чиқариш жараёни тугагач, анъанавий қурувчилар ишни давом эттирган. Улар том, эшик ва деразаларни ўрнатган, шунингдек, хоналарни яшаш учун зарур жиҳозлар ва мебель билан таъминлаган.
Ҳар бир квартиранинг майдони 40 квадрат метрдан 50 квадрат метргача. Улар мустақил яшаш учун мўлжалланган бўлиб, ҳар бирида алоҳида ошхона, иш зонаси, меҳмонхона, ҳаммом ва ухлаш жойи мавжуд.
Архитекторлар хоналарга табиий ёруғлик кўпроқ тушишига ҳам эътибор қаратган. Шу мақсадда квартираларда кўплаб деразалар ва том орқали ёруғлик туширадиган махсус конструкциялар ўрнатилган.
3D-босмада материал қатламма-қатлам ётқизилиши сабабли бетон деворларда ўзига хос ғадир-будур кўриниш пайдо бўлади. Интерерда бу хусусиятни юмшатиш учун ёғоч, пробка ва гипсокартонга ўхшаш материаллардан фойдаланилган.
