Бин Лодин ёнидаги MI6 агенти
Усома бин Лодин теракт вақтида Афғонистонда яшаган. «Толибон» назоратидаги давлатда ҳарбий полигон яратиб, террорчиларни тайёрлаган. Унинг маконлари тоғ орасида бўлган. Электрон воситалардан фойдаланмагани учун унинг жойини аниқлаш осон бўлмаган. Лекин дунёдаги энг қудратли разведка идораларидан бири MI6 бин Лодиннинг олдига ўз агентини кирита олган. Тўғрироғи, «Ал Қоида» лидерининг яқинидаги одамлардан бирини ўзига ишлашга кўндира олган. Унинг исми Айман Дин. У ҳам худди бин Лодин каби саудиялик.
Айман ўз вақтида Боснияда жанг қилган, шахсан бин Лодинга содиқлик қасамини ичган. Гуруҳнинг эски аъзоларидан, портловчи моддалар ясаш бўйича асосий мутахассислардан бири бўлган. 1998 йил «Ал Қоида» Американинг Танзания ва Кениядаги элчихоналарини портлатиши оқибатида юзлаб тинч аҳоли вакиллари ҳалок бўлади. Айман ўша воқеалардан кейин бин Лодин ва «Ал Қоида» ҳеч қандай «муқаддас уруш»да қатнашмаётгани, тўлиқ террор билан шуғулланаётганини тушуниб етади. Аёллар, болалар, бегуноҳ одамлар ҳалок бўлишини исломга зид деб билган Айман гуруҳдан кетишга қарор қилади.
Афғонистонни тарк этиб, Қатарга борган вақтида маҳаллий махсус хизмат уни қўлга олиб, Британияга топширади. Инглизлар Айманга икки томонлама агент, яъни «қулоқ» бўлишни таклиф қилади. Рози бўлиб Афғонистонга қайтган Айман агент эканини билдирмай ишлашда давом этади. У электрон қурилмалардан фойдалана олмагани сабаб ҳар замонда гуруҳнинг ишлари ёки саломатлигини баҳона қилиб Покистонга бориб, у ердаги MI6 агентларига маълумот бериб туради.
Айнан у берган маълумотлар асосида Ню-Йорк метросидаги теракт олди олингани айтилади. 11 сентябр терактидан кейин ҳам Айман Дин гуруҳ таркибида фаолиятини давом эттиради. Лекин 2006 йил америкаликлар у аниқлаган махфий маълумотни ошкор қилиб қўйгач, Айман фош этилиши муқаррар бўлиб қолади. Британия уни тезда эвакуация қилади.
Абдулазизнинг туши
Айман Дин ўз ҳикояларидан бирида Ню-Йорк теракти билан боғлиқ қизиқ воқеани айтиб берган. Гуруҳ аъзоларидан бири тушида самолёт кўринишидаги катта яшил қушга миниб баланд минорага урилгани, бу минора унинг нишони бўлганини айтиб, Аймандан бунинг таъбирини сўрайди. Бомбалар бўйича мутахассис қандай таъбир қиларди, олис ўлкаларда ўлим топсанг керак, дейди-қўяди.
Бу суҳбатни кўпчилик Муҳаммад Отийф деб биладиган «Ал Қоида» ҳарбий қаноти лидерларидан бири Абу Ҳафс ал Масри эшитиб қолади. Ўз вақтида Миср полициясида ишлаган Отийф йигитдан бизнинг режаларимиз ҳақида кимдир сенга гапирдими, деб сўрайди. Йигит йўқ, дейди.
