Ўзбекистонда қурилиш инспекциясининг рухсатномасисиз кўп квартирали уйларни қурганлик учун жавобгарлик кучайтирилмоқда. Бу президент 28 сентябрь куни имзолаган қонунда назарда тутилган. Бу ҳақда Адлия вазирлиг матбуот хизмати хабар берди.

«Лицензиялаш, рухсат бериш ва хабардор қилиш тартиб-таомиллари тўғрисида»ги қонунга киритилган ўзгаришларга кўра, қурилиш-монтаж ишларини бошлаш учун Қурилиш ва уй-жой коммунал хўжалиги соҳасида назорат қилиш ҳудудий инспекциясидан рухсат олиш талаб этилади.

Инспекция рухсатномасисиз кўп квартирали уйларни қурганлик учун фуқароларга БҲМнинг 400 баравари (176 миллион сўм), мансабдор шахсларга эса 450 баравари (198 миллион сўм) миқдорида жарима белгиланади. Жиноят кодексига инспекция рухсатномасисиз кўп квартирали уйларни қуриш маъмурий жазо қўлланилгандан кейин такрор содир этилса, 3 йилдан 5 йилгача озодликдан маҳрум қилиш жазоси киритилмоқда.

Бундан ташқари, шаҳарсозлик тўғрисидаги қонунчиликни бузиш инсоннинг ўлимига ёки бошқа оғир оқибатларга олиб келса, беш йилдан етти йилгача озодликдан маҳрум қилиш билан жазоланади.

Қонун расмий эълон қилингандан кейин уч ой ўтгач (2026 йил декабр ойи охирида) кучга киради.

Қурилиш инспекцияси ваколатлари

Қонун билан Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг сейсмик хавфсизлик соҳасидаги ваколатлари ҳам аниқлаштирилмоқда.

Хусусан, идора қурилаётган бино ва иншоотларнинг сейсмик хавфсизликка оид техник тартибга солиш соҳасидаги норматив ҳужжатлар талабларига мувофиқлигини назорат қилади.

Шунингдек, инспекция электрон техпаспортлар асосида бино ва иншоотларни сейсмик заифлик даражаси бўйича классификация қилишда, уларни инструментал-техник текширувдан ўтказиш ва сейсмик барқарорликни ошириш ишларида иштирок этади.

Сейсмик фаол зоналарда қурилиши режалаштирилган ва инспекция назорат объектига кирадиган барча турдаги бино ва иншоотлар, шунингдек, кўп қаватли турар жойлар учун электрон техпаспортлар шакллантирилади. Уларда объектларнинг сейсмик заифлигини баҳолаш учун зарур маълумотлар бўлиши шарт.

Бундан ташқари, инспекция қурилаётган бино ва иншоотларнинг сейсмик барқарорлигини таъминлаш ҳамда мавжуд объектларнинг барқарорлигини ошириш чораларини кўриши лозим.