«Дунё» ахборот агентлиги хабарига кўра, бу масалалар Ўзбекистоннинг Покистондаги элчиси Алишер Тўхтаев ва Nishat Group бош директори Муҳаммад Манша ўртасидаги видеоконференцияда муҳокама қилинган.
Суҳбатда меҳмонхона бизнеси, тўқимачилик саноати, озиқ-овқат маҳсулотларини қайта ишлаш ва ислом молияси соҳаларида инвестиция лойиҳаларини амалга ошириш имкониятлари кўриб чиқилган.
Муҳаммад Манша компаниянинг Лаҳор ва Лондонда меҳмонхоналари борлигини, 2026 йил ноябрида эса Исломободда янги меҳмонхона ишга туширилишини айтган. У Ўзбекистонда туризм ривожлангани ва меҳмонхоналарга талаб юқорилигини инобатга олиб, бу соҳада инвестиция лойиҳасини амалга ошириш компания учун манфаатли бўлишини билдирган.
Nishat Group вакиллари Ўзбекистонда исломий банк ташкил этиш имкониятларини ўрганишга ҳам қизиқиш билдирган. Компания Покистонда исломий банкинг бўйича катта амалий тажриба тўплаганини қайд этган.
Бунда Ўзбекистондаги қонунчилик ва лицензиялаш талабларидан келиб чиқиб, алоҳида исломий банк очиш ёки маҳаллий ҳамкорлар билан қўшма банк лойиҳасини амалга ошириш вариантлари кўриб чиқилиши маълум қилинган.
Музокаралар давомида компания раҳбарияти ва мутахассисларининг Ўзбекистонга сафарини ташкил этишга келишилган.
Nishat Group Покистоннинг энг йирик бизнес гуруҳларидан бири бўлиб, тўқимачилик, банк-молия хизматлари, қурилиш материаллари, суғурта, энергетика, меҳмонхона бизнеси, кўчмас мулк, қишлоқ хўжалиги, автомобилсозлик ва авиация соҳаларида фаолият юритади.
Гуруҳ таркибига Nishat Mills Limited, MCB Bank Limited, MCB Islamic Bank Limited, D.G. Khan Cement Company Limited, Adamjee Insurance, Nishat Power Limited, Nishat Hotels and Properties, Nishat Dairy ва Hyundai Nishat Motor каби компаниялар киради.
