Суратда Путин ва Шрёдер устига самовар ҳамда тебранма от ҳайкалчалари қўйилган печ ёнида тургани акс этган.
Кремль баёнотига кўра, Путин 7 октябр эрталаб Шрёдернинг Москвага келганини ОАВ хабарларидан билган ва «эски дўстини уйига таклиф қилган».
«Давлат раҳбари кеча туғилган кунини нишонлаётганида Герҳард Шрёдер Владимир Путин билан бирга бўлди», — дейилади хабарда.
Шрёдер Москвага нима учун келган?
Собиқ канцлер Москвага «Глобус» гипермаркетлар тармоғи раҳбарияти ва ходимлари билан учрашиш учун борган.
Яқинда у Россиядаги Globus гипермаркетларини бошқарувчи «Гиперглобус» компанияси кузатув кенгаши аъзоси бўлган эди.
Германияда унинг янги лавозими танқид қилинди
82 ёшли Шрёдернинг Россиядаги компанияда раҳбарлик лавозимини эгаллаши Германияда танқидларга сабаб бўлган.
Христиан-демократик иттифоқ вакили, Бундестаг депутати Родерих Кизеветтер бу тайинловни «Европа ва ўз мамлакатига хиёнат» деб атаган.
Немис иқтисодчиси Ян Шнелленбах эса собиқ канцлерни кескин танқид қилиб, унинг Германия судида иштирок этиш учун соғлиғи етарли эмаслиги ҳақидаги аввалги хабарларни эслатган.
«У Германия суди олдида ҳозир бўлиш учун жуда касал эканини айтишмаганмиди? Наҳотки Россия пуллари шифобахш кучга эга бўлса?» — деб ёзган иқтисодчи X ижтимоий тармоғида.
Герҳард Шрёдер Германия канцлери лавозимини 1998–2005 йилларда эгаллаган. Кейинчалик у «Роснефть» ҳамда «Шимолий оқим» газ қувури оператори — Nord Stream компанияси раҳбариятида ишлаган.
