Ассамблеяда демократик институтларни мустаҳкамлаш, жамоатчилик ишончини ошириш, тенг имкониятларни таъминлаш ва иқлим ўзгаришига қарши курашиш масалалари муҳокама қилинди.
Олий Мажлис Сенати раиси Танзила Норбоева йиғилиш иштирокчиларига жорий йил сентябр ойида Самарқандда ўтказилган Парламентлараро иттифоқ Ёш парламент аъзоларининг XII глобал конференцияси якунлари ҳақида маълумот берди.
Конференцияда глобал муаммолар шароитида инсон ҳуқуқларини ҳимоя қилиш бўйича парламент ечимларини ишлаб чиқиш, БМТнинг «Ёшлар, тинчлик ва хавфсизлик» кун тартибини илгари суриш, рақамли платформаларни масъулиятли тартибга солиш ҳамда ёшларнинг қарорлар қабул қилиш жараёнидаги иштирокини кенгайтириш масалаларига алоҳида эътибор қаратилган.
Шунингдек, Барқарор ривожланиш мақсадларига эришишда ёш парламентарийларнинг ўрни ва имкониятлари муҳокама қилинган.
Хорижий парламент вакиллари Самарқанддаги конференциянинг ташкил этилиш даражаси, халқаро миқёси ва натижаларини юқори баҳолади. Конференция якуний ҳужжатининг амалий аҳамияти ҳамда Ўзбекистоннинг ёшлар парламент дипломатиясини ривожлантиришга қўшаётган ҳиссаси алоҳида қайд этилди.
