Одам савдосига қарши курашиш бўйича марказ директори ўринбосари Дилфуза Шодиева Kun.uz’га одам савдоси қурбонларидан бири билан боғлиқ ҳолатни гапириб берди.
Марказ вакилининг маълум қилишича, меҳнат эксплуатацияси билан боғлиқ ҳолатларда кўпроқ Қозоғистон ва Россиядан қайтарилаётган ўзбекистонликлар мурожаат қилади. Жинсий эксплуатация ҳолатларида эса Туркия, Ҳиндистон ва Бирлашган Араб Амирликларида жабрланган ўзбекистонлик аёллар марказга мурожаат қилмоқда.
«Энага бўлиб ишлайсан деб олиб кетилган»
Марказ вакилининг айтишича, жорий йил бошида Туркиядан Ўзбекистон фуқароси бўлган аёл қайтарилган. У энага бўлиб ишга жойлаштириш ваъдаси билан қариндоши томонидан Туркияга олиб кетилган ва сотиб юборилган.
«Аёл 8 йил давомида фоҳишаликка мажбурланган. Бунга қаршилик қилганида, унга фарзанди орқали босим ўтказилиб, боланинг устига қайноқ сув қуйилган. Аёл ертўлада сақланган. Келганида вазни 32 кило эди, ўзи жуда ёш, у ерда иккита фарзандли бўлган эди. Икки фарзандининг ҳам ҳужжатлари мавжуд эмас. Туркияда ўтказилган полиция тадбири давомида аниқланиб, Халқаро миграция ташкилоти орқали Ўзбекистонга қайтарилган.
Биз уни олиб келганимиздан кейин биринчи навбатда аёл ва болалари билан алоҳида-алоҳида иш олиб бордик. Олти ой давомида у психолог, психотерапевт ва психиатр кўригидан ўтказилди. Оиласи билан кўришиш жараёнлари жуда қийин кечди. Чунки аёл Туркияда бедарак кетганидан куйиб кетган ота-онаси вафот этиб кетишган. Аёл бунда ўзини айблади.
Болалари билан ҳам ишланди, чунки уларда ривожланиш билан боғлиқ айрим кечикишлар кузатилган эди. Ҳозирда фарзандлари боғчага жойлаштирилди, катта фарзандининг ҳужжатлари тўғриланди, иккинчи фарзандининг ҳужжатларини тиклаш жараёни давом этмоқда», — деди марказ вакили.
