DW хабарига кўра, Мерц 13 октябр куни Берлинда Германия иш берувчилар уюшмалари федерал бирлашмаси — BDA ташкил этган «Иш берувчилар куни» тадбирида сўзга чиққан.
Канцлернинг фикрича, иш вақтини мослашувчан ташкил этиш корхоналарга ҳам, ходимларга ҳам янги имкониятлар яратади.
«Халқаро корхоналар бор, уларда кетма-кет 12 соат ишлашади. Ҳафтасига уч марта, кейин эса — етарли», — деган Мерц.
Унинг баҳосича, бундай тартиб ходимларга оиласи учун кўпроқ вақт ажратиш имконини беради. Канцлер саккиз соатдан ортиқ ишлашни ҳар доим ҳам эксплуатация деб баҳолаб бўлмаслигини, бу корхона ва ходимларга иш вақтини қулай тақсимлаш имкониятини бериши мумкинлигини айтган.
Мерц ҳукумат иш вақтига мослашувчан ёндашувни назарда тутувчи қонун лойиҳасини аллақачон тайёрлаши керак бўлганини таъкидлаган. Режага кўра, ҳужжатда иш соатларининг кунлик эмас, ҳафталик максимал чегараси белгиланади. Бу турли иш жадвалларини шакллантиришга йўл очиши кутилмоқда.
Канцлер, шунингдек, корхоналарга ходимлар билан муддатли меҳнат шартномалари тузиш учун кенгроқ имконият бериш ва юқори лавозимдаги менежерларни ишдан бўшатиш тартибини соддалаштириш тарафдори эканини билдирган.
Қонун лойиҳасининг якуний таҳрири билан Германиянинг янги меҳнат ва ижтимоий масалалар вазири Александер Швайцер шуғулланиши кутилмоқда. Президент Франк-Валтер Штайнмайер уни 13 октябр куни мазкур лавозимга тайинлаган.
Илгари Рейнланд-Пфалц ери ҳукуматига раҳбарлик қилган Швайцер олдида пенсия ислоҳотини амалга ошириш вазифаси ҳам турибди.
Аввалги вазир Бербел Бас оғир шахсий ҳолатлар сабабли ҳукумат ва партиядаги вазифаларини тўлиқ бажара олмаётганини билдириб, 12 октябрдан меҳнат вазири ҳамда Социал-демократик партия ҳамраиси лавозимларини тарк этишини эълон қилган эди.
