АҚШ президентининг махсус вакили Стив Уиткофф 21 октябр куни эрталаб Владимир Путин билан учрашиш учун Санкт-Петербургга учиб келди. АҚШ яна Россия ва Украина ўртасидаги урушни тугатиш бўйича музокаралар жараёнини қайта бошлашга ҳаракат қилмоқда. Одатда бундай сафарларда Уиткоффга ҳамроҳлик қиладиган АҚШ президентининг куёви Жаред Кушнер бетоблиги туфайли Россияга келмади, аммо учрашувда видеоалоқа орқали иштирок этмоқда.
Пулково аэропортида Уиткоффни Россия президентининг махсус вакили Кирилл Дмитриев кутиб олди. Путин билан учрашув Москва вақти билан тушга яқин Константин саройида бошланди. Унинг бошланиш қисми матбуот учун очиқ эди. Уиткофф Путинга «дизел келишуви»га рози бўлгани учун миннатдорчилик билдирди ва Россия президенти уч томонлама музокараларни қайта тиклаш имкониятини кўриб чиқишига умид билдирди. Бундан ташқари, у можарони тинч йўл билан ҳал қилиш бўйича «ёндашувлар баён этилган» ҳужжатларни олиб келганини айтди.
Путин эса Россия АҚШ фуқароси Стивен Ҳаббардни озод қилганини эълон қилди, у Украина қуролли кучлари сафида жанг қилган ва Россия асирлигига тушгандан сўнг етти йилга озодликдан маҳрум этилганди.
Путин ва Уиткофф учрашуви қарийб уч соат давом этди.
Ослодаги учрашув
Петербургга келишидан олдин Уиткофф Ослода Украина президенти Володимир Зеленский билан ҳам учрашганди. Музокараларда Норвегия бош вазири Йонас Гар Стуре, Финландия президенти Александр Стубб, шунингдек, Европа Иттифоқи, НАТО, Франция, Буюк Британия, Германия ва Полша вакиллари ҳам иштирок этган. Кушнер эса учрашувда масофадан қатнашган.
Музокаралар якунида Стубб бу учрашув «икки даражада ҳақиқий ўсишга эришиш» имконини берганини таъкидлади: қисқа муддатли истиқболда ва кенгроқ контекстда. Унинг сўзларига кўра, муҳокамалар ҳаво мудофааси, энергетика объектлари ва қисман ўт очишни тўхтатиш имконияти каби асосий масалаларни қамраб олган.
Зеленский Украина ва Ғарбда «тинчликка эришиш бўйича аниқ ғоялар» мавжудлигини, улардан бири «фақат етакчилар ҳал қила оладиган масалаларни ҳал қилиш учун» Трамп, Путин ва Зеленский иштирокида уч томонлама учрашув ташкил этиш эканини таъкидлади.
Москвадагилар бунгача бир неча марта бундай форматдаги учрашувни фақат музокараларнинг сўнгги босқичида ўтказиш мумкинлигини билдиришган. Трамп эса Ослодаги музокаралардан кейин Путин ва Зеленский иштирокидаги уч томонлама музокараларда «иккиси бир хонада бўлиши шарт эмаслиги»ни айтиб ўтди.
