«Дунё» ахборот агентлиги хабарига кўра, Будапештда Венгриянинг MOL Group ва Ўзбекистоннинг SHB ROAD INVEST компаниялари вакиллари ушбу лойиҳани муҳокама қилди. Учрашув Ўзбекистон элчихонаси кўмагида ташкил этилди.
Музокараларда резина билан модификацияланган битум — RMB ишлаб чиқариш технологиясини Ўзбекистонга олиб кириш масаласи кўриб чиқилди. Бу технология эскирган автомобил шиналарини қайта ишлаб, улардан олинган резина увоқларини йўл битумига қўшишни назарда тутади.
Шу тариқа, фойдаланишдан чиққан шиналар йўл қурилиши материалларини тайёрлашда қўшимча хомашё сифатида ишлатилиши мумкин.
Учрашув якунида компаниялар ҳамкорлик меморандумини имзолади. Ҳужжат технологияни Ўзбекистонда жорий этиш масаласини биргаликда батафсил ишлаб чиқишни кўзда тутади. Лойиҳага Ўзбекистон томонидан ҳамкор сифатида SHB ROAD INVEST компанияси жалб этилган.
Ташаббус амалга оширилса, мамлакатда замонавий йўл қурилиши материалларини ишлаб чиқариш ва эски шиналарни қайта ишлаш ҳажмини кенгайтириш имкони пайдо бўлади. Шунингдек, икки мамлакат корхоналари ўртасидаги технологик ҳамкорликни мустаҳкамлаш кутилмоқда.
Ўзбекистон элчихонаси эришилган келишувларни амалга ошириш бўйича кейинги қадамларни ишлаб чиқишга кўмаклашишини билдирган.
