Осмонўпар бинолар қурилиши бугун жасур меъморий ғояларни амалга оширишдан анча кенгроқ аҳамият касб этмоқда. Бундай иншоотлар шаҳарларга сармоя жалб қилиш, янги ишбилармонлик марказларини шакллантириш ва мамлакатларнинг муҳандислик имкониятларини намойиш этишга хизмат қилади.
Қуйида ҳозир қурилаётган энг баланд еттита бино лойиҳавий баландлиги бўйича камайиш тартибида келтирилган. Рўйхатга қурилиш ишлари бошланган объектлар киритилган; фақат майдон тайёрланаётган ёки ишлари тўхтатиб қўйилган лойиҳалар ҳисобга олинмаган.
1. Jeddah Tower — Жидда, Саудия Арабистони
Лойиҳавий баландлиги — камида 1000 метр.
Аввал Kingdom Tower номи билан танилган бу осмонўпар бино дунёдаги энг баланд иншоотлар ҳақидаги тасаввурни ўзгартиришга даъвогар. Лойиҳада унинг баландлигини бир километрдан ошириш, қаватлар сонини эса тахминан 167 тага етказиш кўзда тутилган.
Қурилиш тугаллангач, Jeddah Tower Бурж Халифадан баланд бўлиши ва жаҳон рекордини янгилаши кутилмоқда.
Минора келажакдаги Jeddah Economic City мажмуасининг марказий иншооти сифатида режалаштирилган. Шу боис у алоҳида бино бўлиш билан бирга, янги шаҳар ҳудудини ривожлантириш лойиҳасининг ҳам асосий қисми ҳисобланади.
2. Burj Azizi — Дубай, БАА
Лойиҳавий баландлиги — 725 метр.
Azizi Developments компанияси Дубайнинг Шайх Зайд шоҳкўчасида барпо этаётган минора қурувчи компания номи билан аталган. У шаҳарнинг энг баланд ва кўзга ташланадиган биноларидан бирига айланиши режалаштирилган.
725 метрлик кўрсаткич ҳозирги тайёр бинолар билан таққосланганда, Бурж Халифадан кейинги баландликдир. Бироқ Burj Azizi’нинг келажакдаги жаҳон рейтингидаги ўрни бошқа лойиҳалар, хусусан, Jeddah Tower қачон тугалланишига ҳам боғлиқ.
Минора аввал режалаштирилган Entisar Tower ўрнида қурилмоқда. Meydan компаниясининг бекор қилинган ўша лойиҳасида 570 метрлик, 122 қаватли бино барпо этиш кўзда тутилган эди.
