75 та нусхада ишлаб чиқарилган ўта нодир Mercedes-Benz SLR McLaren Stirling Moss савдога қўйилди. RM Sotheby’s аукцион уйи маълумотларига кўра, унинг бошланғич баҳоси 6 миллион долларни ташкил этади, савдолар эса 26 ноябрдан 3 декабргача бўлиб ўтади.
Автомобил сериядаги охирги модел бўлиб, дастлаб Кувайт ҳукмдор оиласи учун тайёрланган. Машинанинг ўзига хослиги — кузовининг такрорланмас ранги, ноёб жиҳозлари ҳамда АҚШ йўлларида қонуний ҳаракатланиш ҳуқуқига эгалигидадир.
Stirling Moss модели Mercedes-Benz ва McLaren ҳамкорлигида ишлаб чиқилган. 75 та автомобилнинг барчаси Америка сертификатисиз ишлаб чиқарилгани сабабли дастлаб улардан АҚШ ҳудудида расман фойдаланиш мумкин эмас эди. Кейинчалик ушбу моделни Миллий йўл ҳаракати хавфсизлиги бошқармасининг (NHTSA) Show or Display рўйхатига киритишга эришилди. Мазкур тартиб тарихий ёки технологик қимматга эга бўлган кичик серияли автомобилларни йўлларда чекланган даражада ҳайдаш ва кўргазмаларда намойиш этиш мақсадида АҚШ ҳудудига олиб кириш имконини беради.
Намойиш этилган ушбу нусха ўзига хос завод безаги билан ажралиб туради. У Mercedes-Benz Fire Opal Red тусига бўялган бўлиб, бундай кўринишда фақатгина битта Stirling Moss чиқарилган. Сериядаги Rosso Corsa рангига бўялган яна бир қизил автомобил эса Иордания қироллик оиласига тегишли.
Машина салони контраст сариқ чокли қизил чарм билан қопланган. Одатдаги углерод толасидан (карбон) ишланган деталлар ўрнига Alutex материалидан фойдаланилган, тормоз суппортлари эса тилларангга бўялган. Бундан ташқари, автомобил катталаштирилган ўриндиқлар ва аудиотизим билан жиҳозланган. Тавсифга биноан, бутун серияда фақат иккита Stirling Moss — мазкур нусха ва Иордания қироллик оиласи коллекциясидаги автомобил стереотизим билан таъминланган.
Суперкар 2009 йилнинг декабр ойида ишлаб чиқарилиб, сўнг Швейцарияга етказилган. У ерда автомобил илк бор 2010 йил 16 мартда Во кантонида рўйхатдан ўтказилган. Ўшандан буён у бор-йўғи 32,9 мил (тахминан 53 км) йўл босган.
