Rossiyada oddiy qarmoq yordamida 100 kilogrammli laqqa balig‘ini tutishdi

Rossiyaning Kuban daryosida og‘irligi 100 kilogramm, uzunligi 3 metr bo‘lgan laqqa baliq tutishdi. Guvohlarning aytishicha, o‘lja oddiy qarmoq bilan ushlangan. 

Laqqa baliq qarmoqqa ilingach, baliqchi uni tortib olishga shoshmagan. Shu bilan birga bunday bahaybat o‘ljaga bir o‘zining kuchi yetmasdi ham. Laqqa baliqni yetti nafar erkak “uddalashiga” to‘g‘ri kelgan.

Kurash bir soatga yaqin davom etgan. Oxir-oqibat charchagan laqqa baliqni qirg‘oqqa olib chiqishga muvaffaq bo‘lishgan.