Jizzaxda 4 baliqchi hayvonot dunyosiga qariyb 1,8 mlrd so‘m zarar yetkazdi

Jizzaxda noqonuniy baliq ovlagan shaxslar jinoiy jazoga tortildi. Kun.uz sud hujjati bilan tanishdi.

Sud hukmida keltirilishicha, fuqarolar F.G., J.S., A.N. va A.T. bir guruhga birlashib, Forish tumani Egizbuloq mahallasi hududida Aydar-Arnasoy ko‘llar havzasining 92-konturida baliq ovlash bilan shug‘ullanib kelishgan. Ular tabiiy suv havzalarida baliq ovlash qoidalari talablarini qo‘pol ravishda buzishgan. Ya’ni baliqchilar sanoatda ovlash taqiqlangan kichik hajmli oqsila (sudak) va qizilko‘z (vobla) baliqlarini noqonuniy ravishda ovlashgan. Buning oqibatida hayvonot dunyosiga 1 mlrd 789 mln 760 ming so‘m zarar yetkazishgan.

2024 yil 13 iyun kuni Jizzax viloyati IIB xodimlari tomonidan o‘tkazilgan tezkor tadbirda Damas mashinasida olib ketilayotgan 980 dona oqsila va 364 dona qizilko‘z balig‘i ashyoviy dalil sifatida hujjatlashtirib olingan. Keyinchalik ushbu baliqlar iste’molga yaroqsiz holga kelib qolganligi sababli tegishli tartibda yo‘q qilingan.

Sudda baliqchilar ayblariga iqror bo‘lib, qilmishlaridan pushaymonligini bildirishgan va yetkazilgan zararni ishlab qoplab berishlarini aytishgan.

Sud hukmi bilan F.G., J.S., A.N. va A.T. Jinoyat kodeksining tegishli moddasi bilan aybli deb topilgan. Ularning har biriga 3 yil muddatga ozodlikni cheklash jazosi tayinlangan. Shuningdek, ulardan hayvonot dunyosiga yetkazilgan 1 mlrd 789 mln so‘m zarar solidar tartibda undirilishi belgilangan.