"Arab bahori" – Yaqin sharqning qator mamlakatlarida amalga oshirilgan inqilob va davlat to‘ntarishlari – yirik davlatlar tomonidan Yaqin sharqdagi manfaatlarini taqsimlashni boshlashga turtki bo‘ldi. Falastin rahbari Mahmud Abbos, "Al-Jazira" telekanaliga ko‘ra, shunday bayonot bergan.
"Men "arab bahori" hodisalariga o‘ta salbiy yondashaman. Bular yangi Sayks-Piko kelishuvi (o‘tgan asr boshlarida Yevropa davlatlarining Yaqin sharqdagi manfaatlariga oydinlik kirituvchi maxfiy kelishuv)ga tayyorgarlik bo‘ldi va arab davlatlari hamda xalqlariga qarshi qaratildi", - degan Abbos. U Ramallohda Falastinni ozod qilish harakati s'yezdida shunday fikrni bildirgan.
Uning so‘zlariga ko‘ra, "suriyaliklar va boshqa arab davlatlari "arab bahori"dan qayg‘u-alamdan boshqa narsa orttirmagan".
"Hozirgi vaqtda mintaqada bo‘layotgan voqealarning arablar va bahorga umuman aloqasi yo‘q", - degan Abbos.
