Gulen Rossiya elchisi o‘limiga aloqadorligini inkor etdi

AQShda istiqomat qiluvchi imom Fathulloh Gulen Rossiyaning Turkiyadagi elchisi Andrey Karlovning o‘ldirilishiga aloqadorligi haqida rasmiy Anqara tomonidan bildirilayotgan xabarlarni rad etib chiqdi. Bu haqda Gulenning videomurojaatiga asoslangan holda Associated Press xabar qilgan.

O‘z murojaatida Gulen Turkiyaning maqsadi o‘z harakatini badnom qilish ekani haqida aytib o‘tgan.

"Ular dunyoni bu ayblov bilan ishontira olishmaydi", deya uning so‘zlarini keltirgan agentlik.

Rossiya elchisi 19 dekabr kuni Anqaradagi fotoko‘rgazma vaqtida otib tashlandi.

Turkiya hukumati ushbu qotillikni sodir etgan shaxs 22 yoshli politsiyachi Mavlud Mert Oltintosh ekanini bildirdi. Qotil voqea joyida maxsus vakillari tomonidan yo‘q qilindi.

Rossiya TIV bu hodisani terakt sifatida baholadi.

Turkiya prezidenti Rajab Toyib Erdo‘g‘an esa bu qotillikni muxolifat rahbari Fathulloh Gulen bilan bog‘ladi.

"U FETO tarmog‘i a'zosi bo‘lganini yashirishga sabab yo‘q. Uning barcha aloqalari FETO nomiga borib taqalmoqda", degan Erdo‘g‘an.

Rossiya elchisini otgan shaxs Gulen tarafdori bo‘lgani aytildi
Turkiya Karlovning o‘limida AQShda yashayotgan muxolifatchini aybladi
Gulen shtabida Rossiya elchisi qotilligiga aloqadorlik bo‘yicha ayblovlar inkor etildi
Erdo‘g‘an Karlov qotilining Gulen bilan aloqasi borligiga shubhasi yo‘qligini aytdi