Rejissyor Shuhrat Abbosov bugun 86 yoshni qarshiladi

O‘zbek kino san'atining ulug‘ darg‘asi, mashhur rejissyor, professor Shuhrat Abbosov bugun, 16 yanvar kuni 86 yoshga to‘ldi. 

Shuhrat Abbosov “Mahallada duv-duv gap” (1960), “Sen yetim emassan” (1962), “Toshkent – non shahri” (1967), “Abu Rayhon Beruniy” (1974), “Olovli yo‘llar” (1977-1985), “Otamdan qolgan dalalar” (1997), “Dilor, Dilor, dil va or” (2015), “Yana mahallada duv-duv gap” (2016-2017) filmlariga rejissyorlik qilgan.

Shuhrat Abbosov SSSR xalq artisti, “Shuhrat” medali,  “El-yurt hurmati” ordeni va o‘nlab xalqaro kinofestivallarda bosh mukofot sohibi bo‘lgan va eng yaxshi rejissyor sifatida taqdirlangan.

Kinoijodkor Qo‘qon shahrida 1931 yilda dunyoga kelgan. U 1949 yilda Toshkent tibbiyot texnikumi, 1954 yilda Toshkent davlat madaniyat institutini, 1958 yilda “VGIK” (Butunittifoq kinematografiya oliy maktabi)da rejissyorlik kursini tamomlagan. U o‘zining mehnat faoliyatini 1954 yilda Yangiyo‘ldagi Toshkent viloyati musiqali drama teatri bosh rejissyorligidan boshlagan. 

1958-1991 yillarda “O‘zbekfilm” kinostudiyasi rejissyori, 1982-1986 yillarda kinostudiya direktori lavozimida ishlagan. 1983 yildan to hozirgi kunga qadar O‘zbekiston davlat madaniyat va san'at institutida professional mutaxassis va pedagog sifatida talabalarga ta'lim bermoqda.

“Dono Productions”  kinokompaniyasi rejissyorning 86 yoshga to‘lishi munosabati bilan tadbir tashkil etdi. 

Unda kinokompaniya vakillari, Shuhrat Abbosovning shogirdlari, yosh rejissyor va aktyorlar ishtirok etishdi.

“Dono Productions” kinokompaniyasi o‘zbek kinosining afsonasi Shuhrat Abbosovning tavallud ayyomiga bag‘ishlab kichik rolik ham taqdim etgan