Video: Tim Kexill zaxiradan maydonga tushishga tayyorlanayotgan vaqtda qizil kartochka oldi

«Melburn Siti» hujumchisi Tim Kexillga «Melburn Viktori» jamoasiga qarshi o‘yin vaqtida zaxiradan o‘yinga qo‘shilishi arafasida qizil kartochka ko‘rsatildi.

Bu vaziyat Avstraliya A-ligasining 18-tur uchrashuvi vaqtida ro‘y bergan. 86-daqiqada «Melburn Siti» himoyachisi Emmanuel Muskat to‘pni o‘z darvozasiga kiritib yuborgandi, ammo qanot hakami bu vaziyatda hujum qiluvchi jamoa futbolchisi ofsaydda ekanini qayd etgandi. Shundan so‘ng maydonda bahsli vaziyat yuzaga keldi. Yakunda o‘yin bosh hakami Kris Bit yordamchisining qarorini bekor qildi va gol hisoblandi. Maydondagi mojaroga maydon tashqarisidagilar ham aralashdi. Natijada maydonga tushishga hozirlik ko‘rayotgan Kexill o‘z qarshisida qizil kartochka ko‘targan hakamni ko‘rdi. O‘yin Kexill jamoadoshlarining 1:2 hisobidagi mag‘lubiyati bilan yakunlandi.