Rossiya bosh vaziri Dmitriy Medvedev «eng obro‘li mavzelarda uy-joylar, yaxtalar, kvartiralar, Rossiya hamda xorijda agromajmualar hamda vinozavodlar»ga egalik qiladi. Bu haqda siyosatchi Aleksey Navalnyy o‘z blogida ma'lum qilgan.
Uning korrupsiyaga qarshi kurash fondi ma'lum qilishicha, «bu mulklarning barchasi davlat banklari kreditlari hamda oligarxlardan olingan poralar evaziga paydo bo‘lgan». Siyosatchi Medvedev va uning ishonchidagi kishilar notijoriy fondlar asosida «ulkan jinoiy tizim barpo etishgani» haqida yozgan.
«Aktivlarning haqiqiy egasini aniqlashning deyarli imkoni yo‘q, chunki xayriya fondlari hech kimga tegishli emas. Medvedevning mulklarini uning do‘stlari, kursdoshlari va ishongan kishilari boshqaradi», deyilgan tekshiruvda.
Bundan oldinroq KKF (Korrupsiyaga qarshi kurash fondi) 2 mart kuni Plesetskda «Medvedevning dachasi» borligi, bu joy «Dar» va «Gradislava» fondlari nomidaligi haqida ma'lum qildi. «Gradislava» fondi ta'sischisi Leonid Rubtsov «Grin Yard» firmasini ham boshqaradi. Bu kompaniya Medvedevning kursdoshlari Ilya Yeliseyev va Aleksey Chetvertkov tomonidan boshqariladigan «Sotsgosproyekt» fondi tomonidan qo‘llab-quvvatlanadi.
«Sotsgosproyekt» fondi Rublyovkada «hashamatli qo‘rg‘on»ga ega bo‘lib, uning maydoni 3,7 ming kv m. KKF uni 5 milliard rublga baholagan. Ushbu mulk milliarder Alisher Usmonov tomonidan fondga sovg‘a qilingani aniqlangan.
Kursk viloyati hududidagi Mansurovo qishlog‘ida bosh vazirga tegishli yana bir dang‘illama hovli aniqlangan (bu yerda Medvedevning amakisi istiqomat qiladi). Uning maydoni 240 ming kv m: bu yerda ikkita vertolyot qo‘nish maydoni, ulkan suv havzasi hamda tennis korti mavjud. Shu qishloqda «Mansurovo» agromajmuasi bor va u hukumat raisining amakivachchasi nomiga rasmiylashtirilgan.
Navalnyyning so‘zlariga ko‘ra, Medvedev Anapada (Rossiya janubidagi shahar) uzum plantatsiyasi va «Psexako»da 7 milliard rublga baholangan qarorgohga egalik qiladi. Rublyovkada 20 gektar maydondagi yana bir dang‘illama hovli ham unga tegishli. Shuningdek, vazirning Krasnodar o‘lkasida yer maydonlari, Sankt-Peterburgda qadimiy qo‘rg‘oni, Toskanada uzum dalasi, 2ta hashamatli yaxtasi bor.
Navalnyyning fondi o‘tkazgan tergov xulosasida aytilishicha, Medvedevga aloqador fondlar har yili xayriya va kredit ko‘rinishida 70 milliard rubl oladi.
Aziz Qarshiyev
