Mask Falcon raketasining 2-pog‘onasini ham saqlab qolishga urinib ko‘radi

SpaceX kompaniyasi rahbari Ilon Maskning tvitterda ma'lum qilishicha, Falcon Heavy raketasining 2-pog‘onasi ham parvozdan keyin saqlanib qolishi mumkin.

Bunga yoz oxiriga belgilangan ko‘rgazmali parvoz vaqtida urinib ko‘riladi. Maskning aytishicha, muvaffaqiyatga erishishga imkoniyatlar oz, biroq urinib ko‘rish kerak. 
 
"Falcon Heavy raketasining ko‘rgazmali parvozi vaqtida 2-pog‘onani to‘liq ko‘p marotabalikka erishish uchun qaytarishga urinib ko‘ramiz. Muvaffaqiyatga erishishga imkoniyatlar oz, biroq urinib ko‘rish kerak", deb yozgan Mask. 

Avvalroq Mask kompaniyasi tarixda birinchi marta parvoz amalga oshirgan raketani qayta uchirgani ma'lum qilingandi. Koinotga qayta uchirilgan Falcon 9 raketa-tashuvchisi keyinroq Atlantika okeanidagi suzib yuruvchi platformaga qo‘ndirildi.