Oq uy kotibi Asadni "Hitlerdan ham pastkashroq" deya ta'riflagani uchun kechirim so‘radi

Oq uy rasmiy vakili Shon Spayser jurnalistlar uchun o‘tkazgan brifingiada noqulay ahvolga tushib qoldi. U Hitler ham kimyoviy quroldan foydalanish kabi pastkashlikka bormaganini aytdi. 

"Biz hatto kimyoviy quroldan Ikkinchi jahon urushida ham foydalanganimiz yo‘q… Hitler ham kimyoviy quroldan foydalanish darajasiga tushmagan", — degan Spayser va Idlibdagi kimyoviy hujumda Suriya hukumati va shaxsan Bashar Asadni ayblagan. 

Ushbu bayonotdan so‘ng, Twitter ijtimoiy tarmog‘ida matbuot kotibining so‘zlari yuzasidan fikrlar bildirila boshlandi. 

"Shon Spayser gaz kameralarini Holokost markazlari deb atadi. U holda, taxminimcha, Guantanamo  — Madaniyatlararo markaz, shekilli", — deb yozadi foydalanuvchilardan biri. 

Jurnalistlar brifingdan so‘ng, Spayser natsistlar Germaniyasining gaz kameralarini qo‘llaganidan xabari bor yoki yo‘qligiga aniqlik kiritishmoqi bo‘lishdi. Bunga javoban, Oq uy rasmiy vakili buni bilishini, ammo Hitler ham kimyoviy qurolni shaharlarda qo‘llamaganini aytdi. 

"Men Holokostning dahshatli oqibatlarini yumshatmoqchi emasman. Men shunchaki, kimyoviy qurolni aholi punktlariga qo‘llash uchun aviatsiyadan foydalanish chegarasini belgilamoqchi bo‘ldim. Begunoh insonlarga qarshi har qanday hujumga yo‘l qo‘yib bo‘lmaydi", — degan Shon Spayser. 

Kongressning vakillar palatasidagi Demokratlar kamchiligi yetakchisi Nensi Pelosi o‘z navbatida AQSh prezidenti matbuot kotibi Shon Spayserni, Asadni Hitler bilan qiyoslagani uchun iste'foga chiqarishni talab qildi. 

"Shon Spayserni ishdan bo‘shatish kerak. Prezident Tramp esa o‘z vakilining so‘zlarini inkor etishi shart", — deyiladi Pelosi bayonotida. "Spayser yo prezident nomidan gapirgan yoki prezident uni yollamasligi kerak edi", — deb qo‘shimcha qilgan Pelosi.

AQSh prezidenti matbuot kotibi Shon Spayser esa, o‘zining beo‘xshov o‘xshatishi uchun uzr so‘rashga majbur bo‘ldi. U Bashar Asadni Adolf Hitlerga qiyoslagan edi, deb xabar qilmoqda Associated Press agentligi.

Spayser o‘z bayonotini "beadab" o‘xshatish deb baholagan.