“Olmaliq” kombinatiga ishga olib kirib qo‘yishni va'da qilgan firibgar qo‘lga tushdi

“Olmaliq KMK” kombinati idoraviy harbiylashtirilgan qo‘riqlash xizmati xodimi Mirabror Yo‘lchiyev (ism-familiyalar o‘zgartirilgan) avval ham ikki marta sudlangan ekan. Bu shaxs har qanday muammoni hal qilishga va'da beradigan uddaburon edi, deb yozadi “Huquq” gazetasi.

Kunlarning birida uning tuzog‘iga qaynota-kuyov ilindi. Kuyovi ishsiz yurganidan istihola qilgan Karimjon Abdiyevning ko‘ziga M.Yo‘lchiyev najot farishtasiday ko‘rindi. K.Abdiyevning kuyovini Mirabror “Olmaliq KMK” AJning idoraviy harbiylashtirilgan qo‘riqlash xizmatiga ishga joylab qo‘yadigan bo‘ldi. Albatta, bu ish shunchaki “rahmat” evaziga emasdi.

Qaynota bu ishni amalga oshirish uchun Mirabrorga talab qilingan 900 AQSh dollarini tutqazdi. Pulni olgan “hojatbaror” esa odatdagiday yo‘l tutdi. Telefon o‘chirilib, "xizmat doirasidan tashqarida", deya javob beradigan bo‘ldi. Ishning natijasi yuzma-yuz ko‘rishilib, so‘ralganda esa, Mirabror korxonada ishga qabul bo‘lmayotganligini, masala tez orada hal bo‘lishini aytib, bahonalar qilib yuraverdi. Kutaverib charchagan qaynota-kuyovda tegishli joyga ariza berishdan boshqa chora qolmadi.

Jinoyat ishlari bo‘yicha Olmaliq shahar sudi firibgarlikni kasb qilgan M.Yo‘lchiyevga nisbatan qonuniy jazo tayinladi.