Moskva shahrida FSB (Federal xavfsizlik xizmati) xodimlari portlovchi moddalarni noqonuniy saqlagan markaziy osiyolikni qo‘lga oldi.
Qo‘lga olingan Ibrohim Ermatov aprel oyi boshida Sankt-Peterburg metrosidagi portlashni sodir etishda asosiy gumondor hisoblanuvchi Akbarjon Jalilovning sherigi bo‘lgani gumon qilinmoqda.
Ayni vaqtda tergovchilar Ermatov teraktga qay darajada aloqadorligini tekshirishmoqda.
Peterburg metrosining «Sennaya ploshchad» va «Texnologicheskiy institut» bekatlari oralig‘idagi portlash 3 aprel kuni yuz bergan edi. Hodisa oqibatida 16 kishi, jumladan, terrorchi-xudkush Akbarjon Jalilov ham halok bo‘lgan, 50 ga yaqin kishi tan jarohati olgan. Portlash ishi bo‘yicha hozirgacha 10 kishi hibsga olingan.
