09:30 / 23.05.2017
59115

Manchesterda terakt. Qonli hodisa bo‘yicha barcha ma'lumotlar

Foto: Reuters

22 may oqshomida Manchester shahridagi Manchester Arena yopiq stadionida portlash ro‘y berdi. Bu vaqtda amerikalik xonanda Ariana Grandening konserti bo‘layotgandi. Politsiya ma'lumotlariga ko‘ra, hodisa oqibatida kamida 19 kishi halok bo‘lgan, 59 kishi jarohatlangan.

Jabrlanuvchilar yaqin shifoxonalarga olib borilgan, ba'zi kishilarga stadionning o‘zida tibbiy yordam ko‘rsatilgan. BBC News xabariga ko‘ra, ko‘pchilikda mix sanchilishi tufayli jarohatlar qayd etilgan.

Portlash haqidagi axborot mahalliy vaqt bilan soat 22:35 da (Toshkent vaqti bilan 02:35 da) kelib tushdi. Hodisaga oid videolar tarqalgan.

Hozircha portlash qanday sodir etilgani haqida aniq ma'lumotlar yo‘q. Huquq-tartibot organlari hodisani terrorchilik akti sifatida ko‘rib chiqmoqda. Amerikadagi nashrlar portlash terrorchi xudkush tomonidan sodir etilgani haqida ma'lum qildi.

Stadion joylashgan Cathedral Garden tumani aholisiga uylardan chiqmaslik so‘raldi, hududda politsiyachilar navbatchilik qilmoqda.

Manchesterdagi portlashga oid ilk videolar tarqaldi

Buyuk Britaniya bosh vaziri Tereza Mey Manchesterdagi hodisani «qo‘rqinchli terroristik akt» deya baholadi va qurbonlarning yaqinlariga hamdardlik bildirdi.

Dunyodagi ko‘plab mamlakatlar rahbarlari bu teraktni qoralamoqda.

Ariana Grande bu hodisa bo‘yicha chiqish qildi, u tvitterida bu hodisadan keyin «qalbi singani» haqida yozdi.

«Qalbim sindi. Bu hodisa uchun afsusdaman, bu afsusimni so‘z bilan ifodalab bera olmayman», dedi u.

Iroqdagi Akhbaar nashri ma'lumotiga ko‘ra, terakt uchun javobgarlikni IShID o‘z zimmasiga oldi.

Politsiya ma'lumotiga ko‘ra, portlash stadion foyesida yuz bergan, Manchester Arena ma'muriyati esa hodisa «inshootdan tashqarida, jamoat joyida» yuz berganini ta'kidlamoqda. Portlashdan keyin shaharning asosiy temiryo‘l bekatlaridan biri, arena yaqinidagi Manchester Victoria bekati yopilgan.

Manchester Arena asosan konsertlar o‘tkazish uchun mo‘ljallangan. Uning hududida ikki xokkey klubi va bir basketbol jamoasi ham joylashgan.

Politsiya Manchesterdagi portlashga oid yangi ma'lumotlarni berdi

 

 

Top