Samarqand viloyatiga yangi rahbar tayinlandi

13 iyun kuni xalq deputatlari Samarqand viloyati Kengashining navbatdan tashqari sessiyasi bo‘lib o‘tdi.

Sessiyada tashkiliy masala ko‘rildi. «Kun.uz» manbasi bergan ma'lumotga ko‘ra, sessiyada O‘zbekiston Respublikasi bosh vaziri Abdulla Aripov chiqish qilgan. Sessiyada prezident tavsiyasiga binoan Samarqand viloyatiga shu vaqtgacha Bekobod tumani hokimi sifatida ishlab kelgan Turobjon Jo‘rayev hokim vazifasini bajaruvchi etib tayinlangan.

U 12 iyun kuni prezident tomonidan ishdan olingan Himmat Oqbo‘tayev o‘rnida ish boshlaydi.

Jo‘rayev Moliya vaziri o‘rinbosari, Xalq ta'limi vaziri sifatida ishlagan (2004—2008 yy), keyinroq 2008—2011 yillarda Surxondaryo viloyatida hokim bo‘lgan. O‘zbekistonning birinchi prezidenti Islom Karimov 2011 yilning kuzida uni Qashqadaryo viloyatiga hokim etib tayinlagan, 2013 yilning sentabrida esa u qattiq tanqid qilinib, ishdan olingandi.

U shu yilning aprelida rahbarlik lavozimiga qaytarilgan, Toshkent viloyati, Bekobod tumani hokimi sifatida ish boshlagandi.