“Bilib qo‘y, mazang qochadi...” (Jurnalistning boshidan kechirganlari)
|00:03 / 22.06.201745 29623 min
Davlatimiz rahbari Shavkat Mirziyoyev boshchiligida mamlakatimiz sud-huquq tizimini liberallashtirishga qaratilgan ko‘lamli islohotlar amalga oshirilmoqda. Prezidentimizning “O‘zbekiston Respublikasi sud tizimi tuzilmasini tubdan takomillashtirish va faoliyati samaradorligini oshirish chora-tadbirlari to‘g‘risida”gi Farmoni hamda “O‘zbekiston Respublikasining Konstitutsiyasiga o‘zgartishlar va qo‘shimcha kiritish to‘g‘risida”, “O‘zbekiston Respublikasi Sudyalar oliy kengashi to‘g‘risida”, “Sudlar to‘g‘risida”gi O‘zbekiston Respublikasi Qonuniga, “O‘zbekiston Respublikasining Fuqarolik protsessual va Xo‘jalik protsessual kodekslariga o‘zgartish va qo‘shimchalar kiritish haqida”gi, “O‘zbekiston Respublikasining Konstitutsiyaviy sudi to‘g‘risida”gi kabi qator Qonunlarning qisqa vaqt ichida qabul qilinganligi fikrimiz tasdig‘idir.
Mazkur huquqiy hujjatlar sohada ulkan o‘zgarishlar yasalishiga mustahkam asos bo‘lishi, shubhasiz. Ammo sud-huquq tizimida hali ham o‘zibo‘larchilik, fuqarolarni sarson qilish, poraxo‘rlik kabi kamchilik va jinoyatlar to‘la barham topmaganligini hayotning o‘zi ko‘rsatib turibdi. Jumladan, bu to‘g‘rida mamlakatimiz rahbari joriy yilning 13 iyun kuni Toshkent shahrida sud organlari tizimida odil sudlovni ta'minlash borasidagi ishlarning ahvoli, muammolar va istiqboldagi vazifalarga bag‘ishlangan videoselektor yig‘ilishida ta'kidlab o‘tdi.
Sangzor.uz saytida “Jizzax haqiqati” gazetasining maxsus muxbiri Alijon Abdusattorov tomonidan e'lon qilingan maqolada esa mazkur islohotlarga qarshi o‘laroq joylardagi sansolarlik, byurokratizm va rahbarlar tomonidan do‘q-po‘pisali xatti-harakatlar tilga olingan. Mazkur maqola quyidagi mazmunga ega:
“Prezidentimiz aniq misollar orqali sudlar tomonidan yo‘l qo‘yilayotgan kamchiliklar va qonunbuzarliklar haqida batafsil ma'lumot berish asnosida qonunbuzilishlarga nisbatan keskin choralar ko‘rilajagini va sud tizimi tomonidan yo‘l qo‘yilgan har bir adolatsizlik davlatga xiyonat ekanligini bildirdi. O‘zbekiston Respublikasi Adliya vazirligi huzuridagi sud qarorlarini ijro etish, sudlar faoliyatini moddiy texnika jihatidan va moliyaviy ta'minlash departamenti tizimini prokuratura organlari ixtiyoriga o‘tkazishga doir to‘xtam ham Yurtboshimizning bu boradagi vaziyatdan, xalqimiz hayotidan teran xabardor ekanligini ko‘rsatib turibdi.
Shu o‘rinda mavzuga doir bir voqea haqida so‘zlab berishga ruxsat etsangiz. Ochig‘i, dastlab mazkur mavzuda yozishga ikkilandim, ammo Prezidentimizning odil sudlov orqali inson manfaatlarini ta'minlash to‘g‘risida kuyunchaklik bilan bildirgan fikrlari meni qalam tutishga undadi. Ikkalanishim sabablarini ham quyiroqda bilib olasiz.
Mavzuga oid
T U H M A T
Kutilmaganda suddan chaqiruv qog‘ozi oldim. Ammo nima uchundir chaqiruv qog‘ozida sud nomi va menga qancha jarima belgilanganligi hamda sana ko‘rsatilishi kerak bo‘lgan joy ochiq qoldirilgan edi.
Chaqiruv qog‘ozidagi o‘z ixtiyorim bilan sud ijrochilarining Jizzax shahar bo‘limiga bormasam, bu ishga militsiya kirishishi va mendan 1 million 497 ming 750 so‘m undirilishi to‘g‘risidagi jumlalar qog‘oz quyisida keltirilgan B.T.Cho‘liboyevning telefon raqamiga sim qoqishga undadi.
Sudga chaqiruv qog‘ozi
Telefonni ayol ko‘tardi. Uning ovozidan sudda ishlamasligini sezsam ham so‘radim: “Mabodo siz sudda ishlamaysizmi?”. Inkor javobini olgach, Cho‘liboyevni surishtira boshladim. Ma'lum bo‘lishicha, chaqiruv qog‘ozidagi telefon raqami noto‘g‘ri ekan. Atay qilinganmi yoki adashish bo‘lganmi, bir narsa deyish qiyin. Qisqasi, “Jizzaxshahargaz” 890 ming 550 so‘m qarzi bor, deya meni sudga beribdi. Ammo qarzim yo‘qligini juda yaxshi bilardim.
Sud ijrochisi Bobur Cho‘liboyevdan vaziyatning yechimi xatlov, sud va ijro xarajatlarini to‘lash ekanligini bilib oldim. Xatlov davomida gaz uchun 190 ming so‘mdan ko‘proq mablag‘ni oshiqcha to‘laganligim aniqlandi. 398 kub gaz uchun oldindan to‘lov qilganligim to‘g‘risida “Jizzaxshahargaz”dan ma'lumotnoma oldim. Aslida gaz uchun bundan-da ko‘proq pul to‘laganman. So‘nggi 200 ming so‘mlik to‘lovim korxona hisobiga 23 kun o‘tsa ham kirim qilinmabdi(?!).
“MAZANGNI QOChIRAMAN...”
Qarzim yo‘qligi to‘g‘risidagi ma'lumotnomani olib, sud ijrochilarining Jizzax shahar bo‘limiga bordim. Bobur Cho‘liboyev yo‘q ekan, uning hamxonasi Jahongir Ramizovga uchrashdim. Jahongir Ramizov ijro yig‘imi va sud uchun davlat bojini to‘lashim shartligini aytdi, men esa qarzim bo‘lmasa nima uchun to‘lov qilishim kerakligini bildirdim. U qo‘pollik bilan to‘lov qilmasam, jarimaga tortishini aytib, hujjatlarim ustiga “To‘lovdan bosh tortdi” deb yozib qo‘ydi. Uning muomalasi ustidan shikoyat qilmoqchiligimni bayon qildim va “Shikoyat qilavering, men bu yerda jamoatchilik asosida ishlayman, biroq shunday bo‘lsada mazangizni qochirib qo‘yish qo‘limdan keladi”, degan javobni eshitdim.
Mana shu gap ortiqcha edi, nazarimda. Qarzing bo‘lmasa, oldindan to‘lov qilgan bo‘lsang-da “qarzdor” deb sudga berishsa, kamiga “jamoatchi” mazangni qochirmoqni va'da qilsa. Yigitcha bu gaplarni yuragi xasta biror qariyaga aytsa bormi...
Shunday qilib, boshimdan o‘tganlari haqida yozishga qaror qildim. To‘g‘ri, odamning o‘zi haqida yozishi noqulay, buyog‘i kasb etikasi. Ammo gaz ta'minoti idorasidan sudga berib yuborilganlar juda ko‘pchilikni tashkil qilishi meni bu ishga undadi. Shu o‘rinda sud ijrochilarining Jizzax shahar bo‘limi boshlig‘i Olimjon Qilichbekovning mazkur masalalar bo‘yicha bildirgan fikrlari:
— Sud orqali mablag‘ undirishga doir ishlarning 60-70 foizi “Jizzaxshahargaz” hissasiga to‘g‘ri kelayapti. Yana ham qizig‘i, ular tomonidan sudga berilganlarning 50 foizi aslida qarzdor bo‘lib chiqmayapti. Jamoamizda 12 xodim ishlaydi, “Jizzaxshahargaz” tomonidan ishning sun'iy tarzda ko‘paytirilayotganligi bizni ham qiynab yuborayapti. Tashkilotning odamlarga moddiy va ma'naviy zarar yetkazayotgani ham bor gap. Ammo sud buyruq chiqargach, bajarishga majburmiz. Elektr ta'minoti korxonasida bu borada ish tartibga tushib qolgan, ammo gaz idorasida hisob-kitob yo‘q. Xodimimiz Jahongirga keladigan bo‘lsak, uning uchun uzr so‘rayman, yoshda...
Boshliqning xonasidan chiqqach, reja tuza boshladim. Meni sudga berganlarni men ham sudga beraman, moddiy va ma'naviy zararni undiraman. Mayli sud va ijro xarajatlarini to‘layman. Shu maqsadda “mazamni qochirmoqchi” bo‘lgan Jahongirga uchrashdim. U niyatidan qaytmagan ekan. Yigitcha to‘lov qog‘ozida ijro yig‘imi uchun 8 ming 905 so‘m to‘lashim kerak bo‘lgan joyga 89 ming 5 so‘m yozib beribdi. Xullas, Jahongir mendan 80 ming so‘m ko‘proq yulmoqqa bel bog‘lagan. U jamoatchilik asosida ishlaydi, balki shu yo‘l bilan pul topar, yana kim biladi?
Sud ijro to‘lov qog‘ozi
Bitta idoraning ishida "chalkashlik"larning bunchalik ko‘pligi hayratimni oshirdi. Chaqiruv qog‘ozini eplab to‘ldirishmasa, telefon raqamini noto‘g‘ri yozishsa, yana cho‘ntagingga ko‘z olaytirishsa... bu yerda ahvol shunday bo‘lsa, boshqalardan o‘pkalashga hojat bormi?
BARIBIR TUXUM SINADI
Umuman olganda, bu idoralarda hujjatlarni to‘g‘ri rasmiylashtirish urfdan qolgan ko‘rinadi. Fuqarolik ishlari bo‘yicha Jizzax tumanlararo sudining sudyasi O‘.Razykov chiqargan sud buyrug‘i shunday xulosaga undaydi. Buyruqda meni Jizzax tumani, Axborot texnologiya kollejida tug‘ilgan, deb yozishibdi. Aslida kamina G‘allaorol tumanida tavallud topganman. Jizzax tumanidan ekanmanu, buni bilmasdan o‘tib ketishimga sal qolibdi. Aytgancha, Sharof Rashidov tumanida tug‘uruq kollejda qabul qilinadimi?
Xullas, sud va ijro xarajatlarini to‘lab, sudga ariza yozdim. Topshirgan hujjatlarimda kamchilik bor, deb ikki marta qaytarishdi. Qaytarishlarning asl sababi sud xarajatlarini yana menga to‘latish edi. Qisqasi, gazchilar meni sudga bersa ham, ularni men sudga bersam ham sud xarajatlarini kamina to‘lashi kerak ekan. Naqlda aytilganidek, toshga tuxum urilsa ham, tuxumga tosh urilsa ham tuxum sinadi.
Ortiqcha chopa-chopga vaqtim ham, xohishim ham yo‘qligi sabab sudlashishdan voz kechdim. Endi meni qanday hujjatlar asosida sudga berilganim qiziqtirardi, shu to‘g‘rida intervyu olishga harakat qildim. O‘n martalar telefon qilib, fuqarolik ishlari bo‘yicha Jizzax tumanlararo sudi raisining vaqti yo‘qligi yoki o‘zi telefon qilajagi to‘g‘risidagi javobdan o‘zgasini ololmadim. Shundan so‘ng fuqarolik ishlari bo‘yicha viloyat sudiga telefon qildim. Agar intervyu olishimga qo‘yishmasa, Oliy sudga chiqish niyatim borligini bildirdim.
Sud buyrug‘i
Meni sudya Sobir Kuliyev qabul qildi va savollarimga quyidagicha javob qaytardi:
— Gaz ta'minoti idoralari Soliq kodeksiga muvofiq, sudga to‘lanadigan davlat bojidan ozod qilingan. Shu sababli ikki holatda ham sud xarajatlarini siz to‘lashingizga to‘g‘ri keladi. So‘rayotgan masalangiz bo‘yicha intervyu uchun Oliy suddan ruxsat olishingiz kerak, bu to‘g‘rida Oliy sudning ko‘rsatmasi bor. Ko‘rsatmani ko‘rish uchun fuqarolik ishlari bo‘yicha viloyat sudining raisiga yozma murojaat qilishingiz zarur.
Fuqarolik ishlari bo‘yicha viloyat sudidan chiqib ketar ekanman, Alisher ismli sud xodimi ijirg‘anib, “Siz sudya bilan gaplashishda 5 ta xatoga yo‘l qo‘ydingiz”, dedi. Tabiiyki, xatolarimga qiziqdim. U bo‘lsa, jyerkish va po‘pisa ohangida “Joyi kelsa, bilib olasiz” dedi.
«PODRYaD»NING IChIDA SIZ HAM BORSIZ
Ana shunaqa gaplar. Endi “Jizzaxshahargaz”da boshimdan kechirganlarimga to‘xtalsak, qarzim yo‘qligi to‘g‘risida ma'lumotnoma olish tashvishi bilan yurgan kezlarimda mening sudga berilishim sababchisi — O‘sha vaqtda nazoratchi bo‘lib ishlagan, hozirda uchastka rahbari Normat Davronovdan sudga berilganligim boisini so‘radim. U “uyda bo‘lmagan bo‘lsangiz kerak, O‘sha vaqti o‘sha ko‘chani podryad sudga berib yuborganmiz” dedi. Uning gap ohangi zerikkan odamning esnashiga o‘xshardi.
Yanada ajablanarlisi, qarzim yo‘qligi to‘g‘risida menga ma'lumotnoma berilgan bir paytda “Jizzaxshahargaz”da saqlanayotgan abonent kartamda 1 million 997 ming 131 so‘m 42 tiyin qarzim borligi ko‘rsatilgandi. «Shovvoz»lar yo‘q qarzga 631 ming so‘m penya ham qo‘shib qo‘yishibdi. Gazchilar bunday “qoyilmaqom” natijaga gaz hisoblagichimdagi ko‘rsatkichlarni hujjatlarda soxtalashtirish orqali erishganlar. Aslida gaz hisoblagichda mening 3 ming 526 kub gaz yoqqanim aks etib turibdi. Ularning hujjatlarida esa 13 ming 511 kub (?) gaz ishlatganim ifodalangan. Yana ham aniqrog‘i 9 ming 985 kub gazni noqonuniy tarzda mening hisobimga yozib qo‘yishibdi. 23 kun ilgari qilgan 200 ming so‘mlik to‘lovim ham hech joyda aks etmaganligini abonent kartani qo‘limga olganimdan so‘ng bildim.
Viloyat aholisining, jumladan, Jizzax shahrida yashovchilarning gazdan qarzdorligi milliard-milliard so‘mni tashkil etayotganligining siri mana shu kabi "qoyilmaqom amaliyot"larga borib taqalsa, ajab emas. Endi iste'molchining qay tartibda sudga berilishi haqida ma'lumot.
— Sudga berish uchun 3 kun muddatda qarz to‘lanishi lozimligi, aks holda iste'molchining ishi sudga oshirilishi to‘g‘risida nazoratchi yozma ogohlantirish xati berishi kerak, — deydi "O‘zdavneftgazinspeksiya" hududiy viloyat bo‘limining bosh mutaxassisi Bahodir Xidirov. — Bu muddatda qarz to‘lanmasa, filial rahbariyati topshirig‘i bilan qarzdor gaz tarmog‘idan uziladi. Bu to‘g‘rida dalolatnoma tuzilib, unga chilangar, nazoratchi, hudud ustasi va iste'molchi imzo qo‘yishi kerak. Agarda iste'molchi dalolatnomaga imzo qo‘yishdan bosh tortsa, MFY vakili yoki ikki nafar xolis imzo qo‘yadi. Shuningdek, MFYdan fuqaroning o‘sha manzilda yashashi to‘g‘risida ma'lumotnoma olinishi zarur. Bu hujjatlarning barchasi jamlanib, bo‘lim boshlig‘iga topshiriladi. Hujjatlarni bo‘lim boshlig‘i filial boshlig‘iga, boshliq korxona huquqshunosiga beradi. Sudga taqdim etilajak hujjatlarga fuqaro va gazlashtirish idorasi o‘rtasida tuzilgan shartnoma nusxasi ilova qilinadi. Mazkur hujjatlar asosida sudga da'vo arizasi kiritiladi. Da'vo arizasiga rahbar qo‘l qo‘yishi hamda sudga berilgan hujjatlarning bir nusxasi gaz ta'minoti idorasida saqlanishi shart.
QO‘ChQORMISAN, QO‘YMISAN?
Meni na ogohlantirishgan, na dalolatnoma tuzishgan, na quvurni kesishgan. Sudga berilganimni MFYdagilar ham bilishmaydi. Shuncha ma'lumot bilan "Jizzaxshahargaz" filialiga bordim. Korxona boshlig‘i Shavkat Xolmatov hech bo‘lmasa, uzr so‘rar, deb o‘ylagan edim, ammo...
Siz yaxshisi, u kishi bilan qilgan suhbatimiz tafsiloti bilan tanishing. Aytgancha, rahbar ishni hujjatimni ko‘zdan kechirishdan boshladi.
— Sizga hech tuhmat qilishganmi, dedim.
— Har kuni tuhmat qilishadi, lekin asabimni buzmayman, nega bunaqa savol berayapsiz?
— Meni gazdan qarzing bor, deb sudga berishibdi, aslida qarzim yo‘q, mana ma'lumotnoma.
— O‘qib ko‘rgan bo‘lsangiz, ma'lumotnomaning amal qilish muddati uch kun. Bundan tashqari, unga men imzo qo‘ymaganman.
— To‘g‘ri, siz qo‘l qo‘ymagansiz, ammo shu korxonaga rahbarsiz, qog‘ozda muhr bormi?
— Bunga o‘zingiz aybdorsiz, biror marta kelib, sverka qilib ketdingizmi, ana kelmagansiz, eslay olmayapsiz. Bu to‘g‘rida Vazirlar Mahkamasining qarori bor. "Jizzaxshahargaz"da 33 nazoratchi ishlaydi, ular 30 mingta abonentnikiga kirishga ikki oy deganda zo‘rg‘a ulguradi.
— Xo‘p kelmaganim, mening aybim, lekin nega xatlovda qarzi yo‘q, deb ma'lumot berishayapti, ammo abonent kartamda esa yaxshigina qarzni bo‘ynimga ilib qo‘yishibdi, u ham yetmagandek, 20 kundan oshibdi, 200 ming so‘mlik oxirgi to‘lovim abonent kartaga kirmay qolayapti?
— Kim berdi abonent kartani?
— Buning nima farqi bor, meni sudga berishga asos bo‘lgan hujjatlar nusxasini ko‘rsata olasizmi?
— Bizda nusxa qolmaydi, originali sudga ketadi, fuqaroning ismi-sharifi, qarzi to‘g‘risidagi ma'lumot qoladi.
— Bir daqiqa shu gapingizni yozib olay.., keyingi savolim...
— Qo‘chqor aka... (ovozi balandlashdi, ismimni beixtiyor Qo‘chqor deb atay boshladi, qo‘y demadi, harqalay). Siz juda chuqurlashib ketayapsiz, men siz bilan gaplashmayman, boring, viloyat gazdan ruxsat olib keling.
— Menga ayta olasizmi, nima uchun sizdan intervyu olish uchun yuqori tashkilotingizdan ruxsat olishim kerak. Bunga huquqiy asosingiz bormi?
— Chiq xonamdan, davleniyem ko‘tarilib ketdi, hozir mazam qochadi.
— Sal avval tuhmat qilishsa ham asabim buzilmaydi, degandingiz, men rost gapni aytayapman.
— Chiq, deyapman. (Boshliq xonadan chiqdi va shu idorada ishlovchi bir qizni boshlab kelib, meni ko‘rsatdi, unga "Mana shu odamni ko‘rdingmi, eslab qol", dedi. Qiz chiqib ketdi, Boshliq eshikning oldiga borib o‘zini ketishga chog‘langanday tutdi va "Bl..." deya yana nimalarnidir g‘udrandi).
— Haqorat qilayapsizmi?
— Bu boshlanishi, hali shunday yozuvchi odamlarni topib ustingdan yozdiraman. Hujjatini ko‘rsatmadi, deyman, hammasi tuhmat, deyman, chiq!
Ochig‘i, mezbonning bunaqa muomalasi kulgimni qistatdi. Bu yerdan boshqa ma'lumot ololmasligimni bilib, boshliqning xonasini tark etdim. Qiziq, bunday odamlar qanday qilib rahbar bo‘lib qolar ekan? U haqligimni bilgani uchunmi, abonent kartamga bir marta ham qarab qo‘ymadi.
BU BOShLANIShI...
Boshliqning "bu boshlanishi" degani rost bo‘lib chiqdi. Shu kuni kechqurun soat 19 lar atrofida uyimga mahallamizga biriktirilgan gaz nazoratchisi, meni sudga bergan uchastka ustasi va yana bir notanish kishi kelib, gaz uskunalarini ko‘zdan kechirmoqchi ekanliklarini aytishdi. Ochig‘i, ularning kechki tashrifi yoqmadi. Shavkat Xolmatov odam yetishmaydi, degandi, bo‘larkan-ku uch kishini birdan jo‘natsa. Nazoratchining yaqinda kelib, xatlov qilganligini aytsam-da, ularning uyimga kirish istagi so‘nmadi.
Jahlim chiqib hujjat so‘radim. Birida yo‘q ekan, ichkariga qo‘ymadim. Ikkovlashib, gaz uskunalarini ko‘zdan kechirishdi, hujjatlarga ko‘z yugurtirishdi. Shu payt MFY raisi, kotib va maslahatchi yetib keldi. Gazchilardan birini kiritmaganim uchun kimdir fuqarolar yig‘iniga “gazchilarni uyiga kiritmabdi”, deya qo‘ng‘iroq qilibdi. Xullas, ushlaydigan narsa topa olishmadi, shekilli, "yozish" fikridan qaytarish uchun "uzr" so‘ragan bo‘lishdi, nazoratchi meni tanimaganligi uchun shunday yo‘l tutganligini aytdi. Demak, sudga tortish borasida ham "taniqli"larda imtiyoz bor, oddiy odamlarda-chi?
Men "Jizzaxshahargaz" boshlig‘ining o‘gitiga amal qilib, "Markazgazta'minot" unitar korxonasi viloyat gaz ta'minot boshqarmasi boshlig‘i Mamarajab Akbutayevga sim qoqdim, u kishi o‘sha kuni vaqti yo‘qligini aytdi. Unga kutishimni bildirdim. Keyingi kuni intervyu olishim sababini so‘radi. Men aytdim. Shundan keyin Mamarajab Akbutayev telefonni ko‘tarmay qo‘ydi. Umid dunyosida bir necha kun qayta-qayta telefon qildim, foydasi bo‘lmadi.
NA MULOQOT, NA MANFAAT...
Bir do‘stim sud timsoli hisoblangan ko‘zi bog‘liq adolat xudosi Femida to‘g‘risida shunday gapni aytgandi. "Bilasanmi, Femidaning bog‘ichi ostida ko‘zlar yo‘q. Zamonning zo‘rlari adolat tarozisini o‘zlariga ma'qul tomonga og‘dirish uchun bechoraning ko‘zlarini o‘yib olishgan". Do‘stimga ishonsak, nazoratchilar zo‘rlar toifasiga kiradi, aks holda sudya uning tuhmatiga asoslanib, yetarli hujjatlarsiz menga nisbatan sud buyrug‘i chiqarmagan bo‘lardi.
Ochig‘i, sud tizimi haqida fikrim sal bo‘lakcharoq edi. Menimcha, ular adolatli bo‘lish qasamini ichishadi. Qolaversa, insof, vijdon degan tushunchalar ham bor. Prezidentimiz kuyib-yonib xalq bilan muloqot qilinglar, inson manfaatlarini ko‘zlanglar, deyapti. Men bo‘lgan idoralarda bu gaplarning aks-sadosi eshitilmadi yo mening quloqlarim eshitmay qolganmikan?
Bundan tashqari hurmatlidan hurmatli azizlar, ommaviy axborot vositalari hamda axborot olish erkinliklari va kafolatlariga doir qonunlarni bo‘sh vaqtingizda bir varaqlab qo‘ying. Agar muxbir mavjud qonunchilikka zid talabingiz bo‘yicha har bir intervyusi uchun yuqoridan yuqori tashkilotlarning ruxsatini kutaversa, nima bo‘lishini bilasizmi?
Allomaning "Devorga kalla qo‘yilganda, faqat bosh yoriladi" degan gapi rostga o‘xshaydi. Shunday qilib qo‘l siltashimga to‘g‘ri keldi. Iltimos, irodasizlikda ayblamang. Men bu maqolani qisqa yozishga harakat qilganman. Qaysi idoraga necha marta borganimni, kimlarning eshigi tagida sarg‘ayganimni, bu jarayonda kimlarningdir ijirg‘anishi, po‘pisasi va hasratini yuragimdan o‘tkazishga majbur bo‘lganimni yozmadim, yozganimda meni tushungan bo‘lardingiz.
Yana shuni bildimki, qaysi idorada bo‘lmayin hech kim qarzim bo‘lmasada nohaqdan sudga tortilganimni eshitib, ajablanmadi. Bu mazkur vaziyatga hamma ko‘nikib qolganidan bo‘lsa kerak. Men ommaviy axborot vositasi xodimi sifatida shuncha tashvishlarni boshdan o‘tkazdim, oddiy odamlar nima qilishayapti ekan?
Aytgancha, maqola tayyorlash jarayonida "Jizzaxshahargaz" ovorayu sarson qilgan yana bir insonni uchratib qoldim. Uning voqeasi oldida mening kechmishlarim hech gap emas. Qisqasi, bunaqa natijadan so‘ng hafsala va kuch topolsam yozarman o‘sha sargardon haqida...”
