Samarqand shahri hokimi Vohid Rahimov jurnalistlar bilan o‘tkazilgan matbuot anjumanida shahardagi yo‘llarning kelajakdagi ko‘rinishlari va shaharda barpo etilishi rejalashtirilayotgan ko‘prik hamda yo‘l o‘tkazgichlar haqida ma'lumot berib o‘tdi.
Rejalashtirilayotgan yo‘l qurilish ishlari va rekonstruksiya qilish va ko‘chalarni kengaytirish — barchasi shaharda transport yuklamasini tartibga solish uchun amalga oshirilayotganini shahar hokimi alohida ta'kidlab o‘tdi.
Shahardagi shartli ravishda G-34 deb ataluvchi ko‘cha qurilishining 3-bosqichiga doir, uni Sadriddin Ayniy ko‘chasi bilan tutashtiruvchi 920 metr uzunlikdagi yo‘l qurilishi davom ettirilishi prezidentning viloyatimizga tashrifi davomida bergan topshiriqlaridan biri edi, dedi shahar hokimi.
Mazkur qurilish va obodonchilik ishlari yuzasidan tegishli hujjatlar tayyorlanib, 920 metr uzunlikdagi yo‘l qurilishini davom ettirish uchun hozirgi kunda Sadriddin Ayniy ko‘chasigacha qadar oraliqda yashaydigan aholi uy-joylarida muhandislik-dala qidiruv ishlari amalga oshirilmoqda. Ushbu yo‘l bo‘yicha «Yo‘l loyiha byurosi» MChJ hamda uning Samarqand filialiga loyiha-smeta hujjatlarini tayyorlash uchun murojaat etilgan.
Ushbu yo‘nalishda 43 ta turar-joy buziladi, ulardan 23 tasi to‘liq va 20 tasi qisman. Uy joylari buzilayotgan fuqarolarga 6 milliard so‘m kompensatsiya berilmoqda. Uy egalarining xalq bankida ochilgan hisob raqamiga mablag‘lar o‘tkazib berilmoqda, dedi shahar hokimi.
Shuningdek, Samarqand shahrining bir qator ko‘chalarida keyingi yillarda yo‘l qurilish-ta'mirlash uishlarini amalga oshirish bo‘yicha takliflar bildirilgan edi, dedi shahar hokimi.
Jumladan,
- Siyob bozoridan Ro‘dakiy ko‘chasi orqali Beruniy ko‘chasigacha 5 km yo‘lni kapital ta'mirlash;
- Beruniy va Ibn Xoldun ko‘chasi orqali turar joy va turar joy bo‘lmagan binolarni ko‘chirish orqali 4R-46 avtomobil yo‘ligacha 1 km yangi yo‘l qurish,
- Dahbed ko‘chasidan M37 avtomobil yo‘lining Samarqand tumanidagi hududigacha Toshkent shahridagi Nurafshon ko‘chasi namunasida rekonstruksiya qilish,
- Shohi Zinda ko‘chasidan Hujum ko‘chasi orqali Al-Moturudiy majmuasigacha keng yo‘l qurish belgilangan.
Shu kungacha mazkur loyihalar asosida Siyob bozoridan Ro‘dakiy ko‘chasi orqali Beruniy ko‘chasigacha 5 km yo‘lni kapital ta'mirlash, Beruniy ko‘chasidan Ibn Xoldun ko‘chasi orqali 4R-46 yo‘ligacha yangi yo‘l qurish bo‘yicha tegishli qarorlar chiqarildi. Ishchi guruhlari tomonidan yangi yo‘l qurilishi hududiga tushgan va buzilishi lozim bo‘lgan 52 ta turar va noturar joy obekti xatlovdan o‘tkazildi, dedi shahar hokimi V.Rahimov.
