Ichki ishlar vaziri: Toshkent shahar IIBB xodimlari uchun 11 ta ko‘p qavatli uylar quriladi (Video)

26 avgust kuni O‘zbekiston Respublikasi IIV vaziri general-mayor Abdusalom Azizov bayramoldi munosabati bilan Toshkent shahar IIBB shaxsiy tarkibi bilan uchrashuv o‘tkazgani xaqida xabar qilingan edi. 

IIV rahbari Abdusalom Azizov, Toshkent shahar hokimi Rahmonbek Usmonov, Toshkent shahar IIBB boshlig‘i Bahodir Qurbonov, ShIIBB rahbariyati, ichki ishlar faxriylari, keng jamoatchilik va OAV vakillari ishtirokida tashkil etilgan tadbirda Toshkent shahri tumanlari IIB, YHXB, IIBB huzuridagi maxsus bo‘linmalar, kinologiya xizmati bo‘linmasi, post-patrul xizmati va boshqa xodimlari saf tortdi. 

Ichki ishlar vaziri Azizov respublika rahbariyati tomonidan mamlakatda huquqbuzarliklarning oldini olish, jinoyatchiliklarga qarshi kurashish hamda ichki ishlar xodimlarining xalq orasidagi obro‘sini tiklash bo‘yicha tizimli ishlar olib borilayotganini ta'kidladi. Shu bilan birga, xodimlarni, ayniqsa,  profilaktika nozirlarini ijtimoiy qo‘llab-quvvatlash, ularga xizmat joylaridan uncha uzoq bo‘lmagan hududlardan turarjoylar berish, avtomashinalar bilan ta'minlash ishlari olib borilayotgani haqida so‘z yuritdi. Azizovning alohida uqdirishicha, mamlakat hukumati ichki ishlar xodimlarining sharoitlarini yaxshilash borasida jiddiy ish olib bormoqda. 

“Bir narsani aniq bilinglarki, har bir ichki ishlar xodimi davlat himoyasida bo‘ladi”, - dedi Azizov. 

Bundan tashqari, Azizovning ma'lum qilishicha, shahar hokimiyati bilan kelishilgan holda, Toshkent ShIIBB xodimlari uchun har bir tumanda 1 tadan jami 11 ta 9 qavatli xizmat uylari barpo etiladi. 

Vazirning aytishicha, IIBB xodimlari tomonidan avgust oyi mobaynida 43 jinoyatchi aniqlanib ushlangan. Poytaxt hududida xavfsizlikni ta'minlash bo‘yicha olib borilgan chora-tadbirlar natijasida avgust oyi mobaynida shubhali ko‘ringan yoki huquqbuzarlik sodir etgan 35 ming kishi hududiy ichki ishlar bo‘limlariga olib kelingan profilaktika vajlari bilan tekshirilgan. Natijada qator jinoyatlar fosh etilgan va qidiruvdagi shaxslar qo‘lga olingan.

Vazir qisqa kunlar ichida ikkita bayram va yangi o‘quv yilining birinchi kuni bo‘lishi, xalq sayillari va ommaviy tadbirlar o‘tkazilishi ichki ishlar xodimlari zimmasiga yanada jidiy mas'uliyat yuklashi, bu tadbirlar davomida jamoat xavfsizligini ta'minlash, uyushqoqlik bilan o‘tkazish lozimligini ta'kidladi. 

Azizov, shuningdek, shahar IIBB xodimlarining bir guruhini vazifalarini sidqidildan bajarganliklari munosabati bilan faxriy yorliqlar, qimmatbaho esdalik hamda mukofotlari bilan taqdirladi.

“Hurmatli hamkasblar! Sizning xizmat burchingizga bo‘lgan munosabatingiz va sadoqatni ko‘rib, har bir fuqaro qalbida ichki ishlar organlari orqali davlatimizga bo‘lgan ishonch mustahkamlanib borishi tabiiy. Shu maqsadda, an'anaga ko‘ra, sizlarning xizmat natijalaringiz rahbariyat tomonidan munosib taqdirlanmoqda”, - dedi Abdusalom Azizov.  

Tantanali taqdirlash marosimidan so‘ng, Toshkent shahar hokimi Rahmonbek Usmonov ham so‘zga chiqib, poytaxt IIBB xodimlarini yaqinlashib kelayotgan bayramlar bilan qutlab, mamlakat hukumati bayramlarni tinch va osoyishta o‘tkazilishida ularga katta ishonch bilan qarashini yana bir bor ta'kidladi. 

IIV vaziri Azizov tadbir so‘nggida Toshkent shahar IIBB shaxsiy tarkibining jangovar shaylik va tezkor tayyorgarlik holatini ko‘rikdan o‘tkazdi. 

{Yii::t(}

O'tkazib yuborish 6s

O'tkazib yuborish