Markaziy Amerikada "Neyt" tropik shamoli oqibatida 20 dan ko‘proq odam halok bo‘ldi

"Neyt" tropik shamoli oqibatida Markaziy Amerika davlatlarida 20 dan ko‘proq odam halok bo‘ldi. Bu haqda mahalliy hukumatlar xabar bermoqda. 

Meksikaning Financiero portali ma'lumotlariga ko‘ra, Nikaragua va Kosta-Rikada 22 kishi halok bo‘lgan. Tabiiy ofat sababli yana 3 kishi Gondurasda hayotdan ko‘z yumgan.

Nikaraguada daryolar qirg‘oqlaridan chiqib ketgan, butun mamlakat bo‘ylab trevoga e'lon qilingan va maktablar yopib qo‘yilgan. Kosta-Rikada favqulodda vaziyat e'lon qilingan va barcha ta'lim muassasalari yopib qo‘yilgan. 5 mingga yaqin odam vaqtinchalik boshpanalarda qolishga majbur bo‘lmoqda.

Ma'lum qilinishicha, Nikaragua sohillari yaqinida vujudga kelgan "Neyt" shtormi markazida shamol tezligi 64 km/soatni tashkil qilmoqda va hozirda soatiga 12 km tezlik bilan shimoli-g‘arbiy tomon harakatlanmoqda.