Advokatning oqlanmagan ishonchi. Shanba kungi o‘yinlardan keyin kimlarda imkoniyat qoldi?

«Tribuna» shanba kuni bo‘lib o‘tgan JCh-2018 saralashi uchrashuvlari natijalarini tahlil qiladi.

A guruhi
Shvedlar Advokatning ustidan kulishdi

29 sentabr kuni Niderlandiya terma jamoasi bosh murabbiyi Dik Advokat jurnalistning «Shvetsiya Lyuksemburgga 8ta gol ura oladimi?» deya bergan savoliga kulimsiragan holda shunday javob qaytargandi: «Albatta, bunday qila olishmaydi. Bu ilojsiz. Bu qanday ahmoqona savol bo‘ldi?».

Voqealar esa Advokat kutganiday bo‘lib chiqmadi. Niderlandiyaning JCh-2018 saralashi doirasida A guruhidagi to‘g‘ridan-to‘g‘ri raqibi Shvetsiya shanba kuni Lyuksemburg darvozasini 8 marta ishg‘ol etdi. Shvetsiya terma jamoasi safida hali bittadan ortiq gol urmagan Markus Berg shu kuni poker qayd etdi. Andreas Grankvist dublga erishdi, Lyustig va Toyvonen bittadan gol urishdi.

Shu kuni Advokat shogirdlari Belarusni 3:1 hisobida mag‘lub etib qaytishdi. Holbuki imkoniyat saqlab qolish uchun gol o‘tkazmasdan yirik hisobda g‘alaba qozonish shart edi. Endi shvedlarda to‘plar nisbati 26-7, skandinavlardan 3 ochko ortda qolayotgan va oxirgi turda bu terma jamoani o‘z uyida mehmon qiladigan Niderlandiyada 19-12.

Endilikda pley-offga chiqish uchun oxirgi turda Niderlandiya Shvetsiya darvozasiga javobsiz 7ta gol urib g‘alaba qozonishi kerak bo‘ladi.

Guruh yetakchisi Fransiya esa Sofiyada Bolgariyani Blez Matyudining goli evaziga mag‘lub etib ochkolari sonini 20taga yetkazdi va guruhda kamida ikkinchi o‘rinni olishini ta'minladi. Keyingi turda fransuzlar Lyuksemburgni qabul qilishi hisobga olinsa, mundial yo‘llanmasi amalda naqd qilingan.

B guruhi
Barchasi Lissabonda hal bo‘ladi

Bu safargi saralashning Yevropa mintaqasida B guruhi eng raqobatli guruh bo‘ldi. Ayni vaqtga kelib Shveytsariya va Portugaliya Rossiyaga eng yaqin terma jamoalar bo‘lib turishibdi. Yevropa chempionlari birinchi davrada Bazelda 0:2 hisobida mag‘lub bo‘lishgandi va shu tufayli ayni vaqtda guruhda Shveytsariyadan 3 ochkoga ortda qolmoqda. Shanba kuni shveysariyaliklar Vengriyada ishonchli g‘alabaga erishdi (5:2), portugallar Andorrani mag‘lub etdi (2:0). Jamoa hujumchisi Andre Silva o‘yindagi gollardan biriga muallif bo‘ldi, terma jamoaning saralashdagi barcha 9 o‘yinida ishtirok etgan bu futbolchi 9 golda ishtirok etgan (8 gol va bir golli uzatma).

Bu guruhda kim birinchi o‘rinni egallashi 10 oktabr kuni Lissabonda hal bo‘ladi. Portugaliyaning g‘alabasidan boshqa har qanday natija Shveytsariyani Rossiyaga yo‘llaydi. Agar mezbonlar g‘alaba qozonsa, to‘plar nisbati ular tomonida bo‘ladi, portugallar 30ta gol urib, 4ta o‘tkazib yuborishgan, Shveytsariyada 23-5.

Farer orollari latviyaliklarga qarshi o‘yinda navbatdagi ochkosini oldi. 9 o‘yinda ushbu mitti davlat 9 ochko olgan, 2 g‘alaba, 3 durang va 4 mag‘lubiyat. Bu terma jamoaning o‘z tarixidagi eng yaxshi natijasidir. Latviyaliklar esa bu saralash bosqichida faqat bir marta, Andorraga qarshi o‘yinda g‘alaba qilgan. Boltiq bo‘yi davlati oxirgi o‘rinni egallaydi.

H guruhi
Sarayevodagi triller

Sarayevoda Bosniya va Gertsogovina hamda Belgiya terma jamoalari o‘rtasidagi uchrashuv guruhda ikkinchi o‘rin masalasiga ta'sir ko‘rsatardi. Mezbonlar mundial yo‘llanmasini hal qilib bo‘lgan belgiyaliklarni mag‘lub etish orqali ikkinchi o‘rinda qolar va pley-offda o‘ynash uchun yaxshi imkoniyat hosil qilar edi. Noqulay ob-havo sharoitida o‘tgan uchrashuvda Belgiya asosiy tarkibni maydonga tashlamagan bo‘lsada g‘alabaga erisha oldi. Uchrashuvda 7 gol kiritildi, shundan faqat 3tasi bosniyaliklar tomonidan.

Qayd etish kerakki, Roberto Martines shogirdlari saralash o‘yinlarida ilk marta o‘z darvozasidan 3ta gol o‘tkazdi. Shu bilan birga 2009 yildan buyon davom etayotgan saralash o‘yinlaridagi mag‘lubiyatsiz seriyasini davom ettirdi, bunday o‘yinlar soni 19taga yetgan: 16 g‘alaba va 3 durang. 

«Tottenhem» futbolchisi Yan Fertongen terma jamoadagi o‘yinlari sonini 96taga yetkazdi va bu borada shu vaqtgacha rekordchi sanalgan Yan Kulemans bilan tenglashdi. Oxirgi turda terma jamoa Kiprga qarshi o‘ynaydi va bu uchrashuvda maydonga tushsa, Fertongen tarixga kiradi.

Greklar ikkinchi o‘rin uchun to‘g‘ridan-to‘g‘ri raqibining mag‘lubiyatidan foydalanib qoldi. Kiprda kechgan og‘ir uchrashuvda Gretsiya g‘alabaga erishdi. Mehmonlar dastlab gol o‘tkazgandi, ammo iroda namoyish etib, g‘alabani o‘ziniki qildi va guruhda ikkinchi o‘ringa chiqdi. Oxirgi turda Greklar Gibraltarni qabul qiladi, bosniyaliklarda imkoniyat kamroq.

Guruhdagi uchinchi o‘yinda Estoniya Gibraltarni osonlik bilan taslim etdi - 6:0. Tallining «Flora» jamoasi hujumchisi Yoonas Tamm 25 daqiqada 3ta gol urdi. 6 yil oldin terma jamoada debyut qilgan bu futbolchi hali gol urmagandi va birdaniga het-trikni nishonladi. Estonlar bu natija orqali 1928 yildagi natijasini qayd etgandi, Boltiq bo‘yi davlati terma jamoasi oxirgi marta o‘sha yilda raqibni 6:0 hisobida yenggandi (Litvaga qarshi o‘rtoqlik uchrashuvi).