Qirg‘iziston xavfsizlik xizmati Omurbek Babanovdan izoh so‘ramoqda

Qirg‘iziston Davlat xavfsizlik xizmati vakili mamlakat prezidentligiga asosiy nomzod sifatida ko‘rsatilgan Omurbek Babanovdan «uning ayblovlari nima asosida yangraganini e'lon qilishi»ni so‘radi. Bu haqda Interfaks nashri xabar beradi.

«DXX xodimlarini provakatsiya harakatlarini amalga oshirishga urinishda ayblash har tomonlama asoslantirilishi va keng jamoatchilikka taqdim etilishi shart. Aks holda, Omurbek Babanov saylovning oddiy qoidalarini buzib, jamoatchilikni o‘z fikridan chalg‘itmoqda, deb hisoblash mumkin», deydi nashr muxbiri bilan suhbatlashgan Davlat xavfsizlik xizmati xodimi.

Ma'lumot uchun, «Respublika-Ata jurt» partiyasidan nomzod sifatida ko‘rsatilgan Omurbek Babanov saylov boshlanishi bilan mamlakat janubida huquq-tartibot organi xodimlari, jumladan, Davlat xavfsizlik xizmati vakillari jarayonga noqonuniy aralashayotganini iddao qilgan. Uning aytishicha, gap aynan qanday qonun buzilishi haqida ketayotganini u gapirib o‘tirmaydi, barchasi saylov natijasiga bog‘liq.