Qish va bahor oylarida ichki bozorda qishloq xo‘jaligi mahsulotlarida uzilish bo‘lmaydi

O‘zbekiston Respublikasi Prezidentining «2017-2018 yillar qish-bahor faslida respublika aholisini va ijtimoiy soha muassasalarini qishloq xo‘jaligi mahsulotlarining asosiy turlari bilan kafolatli ta'minlash chora-tadbirlari to‘g‘risida»gi PQ-3345-sonli qarori qabul qilindi.

Qaror matniga ko‘ra, u respublika hududlari bo‘yicha aholi va ijtimoiy soha muassasalarining ehtiyojlari uchun qish-bahor faslida qishloq xujaligi mahsulotlarining asosiy turlarini g‘amlab qo‘yish ishlarini samarali tashkil etish, tayyorlov tashkilotlarining ijtimoiy ahamiyatga ega bo‘lgan oziq-ovqat mahsulotlari ishlab chiqaruvchilar bilan hisob-kitoblarni o‘z vaqtida o‘tkazish, omborxonalarni va sovutish sig‘imlarini ko‘paytirish hisobiga ularning iste'mol xossalarini saqlanishi uchun zarur sharoitlar yaratish, shuningdek, mavsumlar o‘rtasida qish-bahor oylari mobaynida ichki bozorga mahsulotni zarur hajmlarda, muntazam, bir maromda yetkazib berish hisobiga narxlarning barqarorligini saqlab turish maqsadida qabul qilingan.

Qarorda 2017–2018 yillar qish-bahor faslida respublika aholisini qishloq xo‘jaligi mahsulotlari bilan ta'minlashning asosiy prognoz parametrlari tasdiqlangan.

Shuningdek, aniqlangan taqchillikni qoplash manbalari, byudjyet mablag‘larining talab-ehtiyojlarining prognoz parametrlari, g‘amlash ishlariga jalb etilgan tayyorlov korxonalarining omborxona va sovutish sig‘imlari bilan ta'minlanganligi parametrlari ma'qullangan.

2017–2018 yillar qish-bahor faslida qishloq xo‘jaligi mahsulotlarining asosiy turlarini ichki bozor va ijtimoiy soha muassasalari ehtiyojlari uchun g‘amlash, shuningdek, sotish uchun yetkazib berish borasidagi ishlarni muvofiqlashtirish bo‘yicha Respublika ishchi guruhi tarkibi tasdiqlangan.