Nemis elchisining Samarqandga tashrifi: Samarali va sermazmun o‘tgan uch kun

Germaniya Fedrativ Respulikasining yurtimizga tayinlangan yangi favqulodda va muxtor elchisi Gyunter Overfeld (Günter Overfeld) iqtisodiy soha delegatsiyasi va jurnalistlar hamrohligida Samarqand shahriga sayohat uyushtirdi.

Martabali mehmon shahar bilan tanishishni avvalo ko‘hna shaharning yuragi bo‘lmish Registon maydonidan boshladi. Elchi ushbu inshootlarning yaratilish tarixi bilan yaqindan tanishtirildi. Ulug‘vor madrasalar xorijlik mehmonda katta taassurot qoldirdi. So‘ngra u hamrohlari bilan Ishratxona hilxonasini borib ko‘rdi.

Ta'kidlash joizki, Tillakori madrasasi va Ishratxona hilxonasida 2004-2009 yilda Potsdam ixtisoslashtirilgan instituti bilan hamkorlikda madaniy meros obidalarini ta'mirlash bo‘yicha Germaniya-O‘zbekiston loyihasi ish olib borgan.

Sayohatining birinchi kunida janob Overfeld shahardagi DVV International loyihasi bilan hamkorlik qiluvchi «Sabr» iqtisodiy-ijtimoiy riojlanish markazini ko‘zdan kechirdi va u yerda yaratilgan sharoitlar bilan tanishdi. So‘ngra iqtisodiy delegatsiya a'zolari va jurnalistlar bilan «Agromir» korxonasiga borib, ishlab chiqarish jarayoni bilan yaqindan tanishdi.

Birinchi kuni kechqurun shahardagi «Platan» mehmonxonasi restoranida o‘zbekistonlik hamkorlar va hamrohlik qilayotgan Germaniya firmalari vakillari hamda jurnalistlar uchun Germaniya elchisi nomidan qabul tashkil etildi.

Ertasi kuni elchi iqtisodiy delegatsiya va jurnalistlar ishtirokida 300 kishidan ortiq kishi mehnat qilayotgan Germaniya bilan hamkorlikda barpo etilgan «MAN-Uzbekistan» zavodiga tashrif buyurdi. Ushbu zavodda MAN yuk avtomobillari va avtobuslari ishlab chiqarilmoqda. Elchi avtomashinalar ishlab chiqarish jarayoni bilan tanishdi, shuningdek, unga zavodda qo‘lga kiritilayotgan yutuqlar va kelajakdagi rejalar so‘zlab berildi.

Samarqand shahrida joylashgan «Sam Antep Gilam» tekstil fabrikasiga uyushtirilgan sayohat ham martabali mehmonda chuqur taassurot qoldirdi. Ayni paytda ushbu korxonada Germaniyadan keltirilgan dastgohlar yordamida kuniga 40 ming kvadrat metr yuzaga teng, 5000 mingdan ziyod gilam mahsulotlari ishlab chiqarilmoqda. Korxonada 2000 nafardan ziyod kishi ko‘p smenada mehnat qilmoqda. Korxona rahbari K.Abdulloyev mahsulotlar asosan MDH davlatlari, shuningdek, Xitoy orqali jahonning boshqa davlatlariga eksport qilinayotganini so‘zlab berdi.

Ikkinchi kunning birinchi yarmida elchi delegatsiya a'zolari bilan Samarqand lift zavodi, «Sino» muzlatkichlar zavodi, «Sharq sanoat» korxonasiga sayohat uyushtirdi. Kunning ikkinchi yarmida mehmon viloyat perinatal markazidagi GIZ ishtirokidagi loyiha asosida xirurgiya trening markazi bilan tanishdi. Shuningdek, bolalar va onalar reproduktiv salomatligini mustahkamlash bo‘yicha KfW banki loyihasi bilan tanishish uchun viloyat ko‘ptarmoqli bolalar shifoxonasiga bordi.

Tashrifning uchinchi kunida elchi jismoniy imkoniyati cheklangan bolalar maktab-internatiga sport inventarlarini sovg‘a sifatida topshirdi.

Shuningdek, elchi shu kuni gulchilik bo‘yicha ekspert — SES loyihasi qay tarzda amalga oshirilayotgani bilan tanishish maqsadida FLORA Service kompaniyasiga tashrif buyurdi. Zarafshon irrigatsiya tizimlari boshqarmasida Germaniya tashqi ishlar vaziri Frants Valter Shtaynmayyerning suv tashabbuslari doirasidagi GIZ loyihasi bilan tanishish uchun Bulung‘ur tumanidagi Bodbod kanalini borib ko‘rdi. Elchi shuningdek, ushbu tumandagi KfW banki loyihasi asosida jihozlangan kasb-hunar kollejida ham mehmon bo‘ldi.

Elchi Gyunter Overfeldning Samarqand shahriga tashrifi samarali va voqealarga boy bo‘ldi. Martabali mehmon ko‘hna shaharning osori atiqalari va bu yerda amalga oshirilayotgan ishlardan katta taassurotlar bilan qaytdi.

Shuhrat Shokirjonov,

KUN.UZ muxbiri.

Fotolar muallifniki.