Toshkent shahar Adliya boshqarmasi inson huquqlari va qonuniy manfaatlarini himoya qilishda davom etmoqda

Toshkent shahar Adliya boshqarmasi tomonidan navbatdagi matbuot anjumani tashkil etildi. Unda "Jismoniy va yuridik shaxslarning murojaatlari to‘g‘risida" gi yangi qonunning ahamiyati va mohiyati, uning amalda tatbiq etilishi va Qonun mazmuni” mavzusidagi tahliliy materiallar jurnalistlar e'tiboriga havola etildi.

Tadbirda ta'kidlanganidek, istalgan davlatning nufuzi inson huquqlari va erkinliklari himoyasining ta'minlanganlik darajasi bilan o‘lchanadi. Mamlakatda barcha sohalarda amalga oshirilayotgan keng ko‘lamli islohotlar zamirida inson huquqlari va erkinliklariga e'tibor qaratish, uning sha'ni hamda qadr-qimmatini hurmat qilish, inson huquqlarini eng oliy qadriyat sifatida tan olish kabi maqsadlar bor.

Inson huquqlari va qonuniy manfaatlarini kafolatlash faqatgina ko‘rsatilgan huquqlar hamda manfaatlarning borligi bilan cheklanmaydi, balki ularni qo‘llash, himoya qilishdan iborat. 

Tahlillarning ko‘rsatishicha, 2017 yilning besh oyi davomida Toshkent shahar Adliya boshqarmasi inson huquqlarini himoya qilish bo‘yicha Bo‘limga inson huquqlari sohasiga oid 500 ta murojaat kelib tushgan, ulardan 32 foiz ariza va shikoyatlar qanoatlantirilgan.

Murojaatlarni ko‘rib chiqish chog‘ida aniqlangan huquqbuzarliklar va davlat boshqaruvi organlari, mahalliy davlat hokimiyati organlari hamda huquqni muhofaza qilish idoralari tomonidan inson huquqlariga rioya etilishi bo‘yicha nazoratni amalga oshirish bo‘yicha taxminan 120 ta ta'sir choralari qo‘llanildi.

Natijada 44 mansabdor shaxs intizomiy javobgarlikka tortildi. Ulardan 7 nafari egallab turgan lavozimidan ozod etildi.