Dunyoning eng badavlat kishisining bir kuni qanday o‘tadi?

Amazon kompaniyasining asoschisi va bosh direktori Jyeff Bezosning moliyaviy holati 93,8 milliard dollarga baholanmoqda. Bloomberg Billionaires Index ma'lumotlari shundan dalolat beradi. 

Amazon'ning uchinchi chorakdagi yuqori daromadi unga 6,44 milliard dollar keltirdi, shundan so‘ng Bezos dunyoning eng badavlat kishisi nomini Bill Geytsdan "tortib oldi".  

Shuningdek The Washington Post gazetasi va Blue Origin aerokosmik kompaniyasi ham Amazon onlayn-giganti asoschisiga tegishli. 

Bu texnologik magnatining oddiy kunlari qanday o‘tadi?

Bezos tabiiy uyqu kuchiga ishonadi. U ertalablari yetarlicha dam olganini his qilgach, soat qo‘ng‘irog‘isiz uyg‘onadi.

Milliarderning kuni doim turmush o‘rtog‘i - yozuvchi Makkenzi Bezos bilan nonushta qilishdan boshlanadi.

Jyeff Bezos hech qachon erta tongga uchrashuv belgilamaydi, kunning bu pallasini u ayoli va 4 nafar farzandiga bag‘ishlaydi. 

Bezos rasmiy yig‘ilishlarni uncha yoqtirmaydi. Aytishlaricha, u Amazon sarmoyachilari bilan uchrashuvlarga yiliga atigi 6 soat ajratadi.

Agar yig‘ilishsiz iloji bo‘lmasa, Bezos "ikki pitssa qoidasi"ni qo‘llaydi: ishtirokchilar soni shunday bo‘lishi kerakki, ularni ikki pitssa bilan to‘ydirish mumkin bo‘lsin.

Aytishlaricha, Bezos o‘z ishchilariga nisbatan juda keskin munosabatda bo‘ladi, ammo "o‘z xulq-atvorini yumshatish maqsadida" psixolog bilan ishlamoqda.

Amazon kompaniyasi madaniyati kamtarlik va tejamkorlikka asoslangan. Bezos ishchilarni massaj yoki bepul tushlik bilan jalb qilish kerak, deb hisoblamaydi. 

Jyeff Bezos noodatiy taomlarni yaxshi ko‘radi. Woot asoschisi Mett Rutlej bilan uchrashuv vaqtida u kartoshka, bekon, yashil sarimsoqli yogurt va tuxumli sakkizoyoqqa buyurtma berdi va bu faqat nonushta. 

Bundan tashqari, Bezos fastfudga qiziqadi. 2014 yilda u Business Insider bosh muharriri Henri Blojyetga Amazon shtab-kvartirasi yaqinidagi ko‘plab burger va xot-doglarga to‘la son-sanoqsiz furgonlar haqida so‘zlab bergan. 

Bezos tushlikdan keyin idishlarni doim o‘zi yuvadi. "Bu men qiladigan ishlar ichida eng jozibalisi ekaniga ishonchim komil", - deydi u.

Bezos sport bilan shug‘ullanadimi yoki yo‘q - noma'lum. Yaqindagina internet tarmog‘i foydalanuvchilari uning yaxshi jismoniy holatda ekanini muhokama qilishgandi va hatto uni kino yulduzi Vin Dizelga qiyoslashgandi. 

Amazon o‘z kanallaridagi bir necha mashhur seriallarga prodyuserlik qiladi - masalan, "Baland qal'adagi inson" va "Shohid". Biroq kompaniya bosh direktori yoshligidagi serialiga sodiq - "Yulduzli yo‘l". U hatto "Startrek:

Mangulik" filmida ko‘rinish ham bergan.

Bezosning yana bir kosmik qiziqishi bor: NASA'ning eski raketalarini izlab suv osti kemasida sayohat qilish. Milliarder ko‘pincha o‘zi bilan farzandlarini ham birga oladi. 

Bezos o‘z rejimini nazorat qiladi va har kuni 8 soatdan uxlaydi.