Jamiyat | 11:05 / 14.11.2017
4754
2 daqiqa o‘qiladi

Toshkent​da Global tadbirkorlik haftaligi​ boshlandi

Foto: tal catran

13-19 noyabr kunlari Toshkent shahrida Global tadbirkorlik haftaligi o‘tkazilmoqda. Tadbir platformasida yoshlar ishbilarmonlarga yangi texnologiya va ishlanmalar haqida ma'lumot berish, tajribali tadbirkorlarning muvaffaqiyat siri hamda o‘zaro fikr almashish haqida so‘z yuritiladi.

Tadbir tashkilotchilari qatorida GroundZero, Korzinka.uz, O‘zbekiston Yoshlar Ittifoqi, Dekos, Savdo-sanoat palatasi, Universal Bank, Murad Buildings kabi yirik kompaniya, uyushma hamda davlat idoralari qayd etilgan.

«Oldimizga qanday maqsadni qo‘yganmiz? Avvalo, yurtimizda tadbirkorlik madaniyatini ommalashtirish va shaxsiy tajribamiz bilan o‘rtoqlashishdir. O‘tgan davr mobaynida O‘zbekistonda tadbirkorlik qaysidir ma'noda rivojlandi, endilikda Silikon vodiysi, Singapur, Xitoy kabi davlatlarning tarixiy tajribasiga murojaat etish vaqti yetdi», deydi tashkilotchilardan biri sifatida Hikmat Abdurahmonov the Steppe nashriga.

Haftalik birinchi kunida tadbirkorlar uchun zarur hisoblangan infratuzilma haqida muhokamalar tashkil etildi. Shuningdek, shu kuni mamlakat iqtisodiyotida sayyohlikning o‘rni va media bozor haqida shaxsiy fikrlar bildirilgan.

«Men yangi davr va katta o‘zgarishlar boshida turgan O‘zbekistondagi tadbirkorlar bilan suhbatlashib tushunib yetdimki, ularning mintaqada istiqboli ulkan va zafarli bo‘ladi», deydi TC Holdings asoschisi, TEDx loyihasi notig‘i Tal Ketran.

Bugun, 14 noyabr kuni haftalik rejasida «StartUp'lar kuni» etib belgilangan. Kun davomida Toshkentdagi Inha universitetida tadbirkorlik saboqlari bo‘yicha seminarlar tashkillashtiriladi. So‘ngra, startaplar tanlovi uyushtirilib, ularning biznesini kelgusida rivojlantirish masalalari ko‘rib chiqilishi mumkin.

Mavzuga oid