Braziliyada “Supermen” ko‘rinishida mototsikl haydagan erkak ushlandi

Braziliyadagi serqatnov trassalardan birida “Supermen” ko‘rinishida, ya'ni mototsikl ustiga yotib olib uni boshqargan erkak ushlandi. U mototsiklni boshi yordamida boshqargan, deb xabar bermoqda Daily Mail nashri.

Videoda qoidabuzarni uning yonidan o‘tib ketayotgan avtomobil yo‘lovchilari tasvirga olganlarini ko‘rish mumkin. Video mahalliy A Voz de Annapolis gazetasiga jo‘natilgan, gazeta esa bu rolikni Facebook’dagi sahifasida joylashtirgan. Rolikda guvohlardan biri “Yigitga buni yo‘l politsiyasiga tushuntirishiga to‘g‘ri keladi”, deb aytgan.

Huquq-tartibot idoralari ijtimoiy tarmoqdagi videoni o‘rganib, “supermen” yigitni ushlashgan. U mototsiklni atrofdagilarga xavf solgan holda haydash, himoya shlemi, davlat raqami va haydovchilik guvohnomasi yo‘qligida ayblandi. Politsiya “nayrangboz”ni garov puli evaziga qo‘yib yubormoqchi.