Qanday holatlarda sudlarda sud majlislari videokonferentsaloqa rejimida o‘tkaziladi?

Hozirgi vaqtda O‘zbekiston Respublikasi Xo‘jalik protsessual kodeksiga asosan sud majlislarini videokonferentsaloqa rejimida o‘tkazish belgilangan, deb yozmoqda Bektemir tuman ma'muriy sudining raisi Saydulla Mixliyev Norma.uz’da. 
 
O‘zbekiston Respublikasining Fuqarolik protsessual, Jinoyat-protsessual va Ma'muriy protsessual kodekslarida sud majlislarini videokonferentsaloqa rejimida o‘tkazish nazarda tutilmagan.
 
Biroq, protsessual qonun hujjatlariga tegishli o‘zgartirishlar kiritilgunga qadar O‘zbekiston Respublikasi Oliy sudi Plenumining 24.06.2017 yildagi "Fuqarolik, jinoyat va ma'muriy ishlarni ko‘rishda sud majlislarini videokonferentsaloqa rejimida o‘tkazishning ayrim masalalari to‘g‘risida"gi 23-son qaroriga asosan fuqaro va tadbirkorlik sub'yektlari - sud protsessi ishtirokchilarining sud orqali huquqlarini himoya qilinishida yanada qulay shart-sharoitlar yaratish, odil sudlovga erishish darajasini oshirish, moliyaviy va vaqt xarajatlarini qisqartirish, shuningdek ishlarni ko‘rishda tezkorlikni ta'minlash va protsessual muddatlarni tejash maqsadida fuqarolik va jinoyat ishlari bo‘yicha sudlar hamda ma'muriy sudlar protsess ishtirokchilarining roziligi bilan Qoraqalpog‘iston Respublikasi, viloyatlar va Toshkent shahar iqtisodiy sudlarida o‘rnatilgan telekommunikatsion texnologiyalardan foydalangan holda sud majlislarini videokonferentsaloqa rejimida o‘tkazishga haqli.
 
Bunda, sud majlislarini videokonferentsaloqa rejimida o‘tkazishning zaruriy sharti ishda ishtirok etuvchi shaxslardan loaqal bittasi boshqa ma'muriy-hududiy birlik (Qoraqalpog‘iston Respublikasi, viloyatlar va Toshkent shahri) hududida, ya'ni ishni ko‘rayotgan sud joylashgan hududdan tashqarida joylashgan bo‘lishi lozimligi hisoblanadi.
 
Videokonferentsaloqa rejimidagi sud majlisi deganda, real vaqt rejimida telekommunikatsiya texnologiyalari vositasida audio- va videoaxborotlar almashinuvi imkoniyatlaridan foydalangan holda ishni ko‘rayotgan sud va sud majlisini o‘tkazishga ko‘maklashayotgan sud o‘rtasidagi interaktiv o‘zaro ta'sir qilish yo‘li bilan masofadan sud majlisini o‘tkazish tushuniladi.
 
Ishni ko‘rayotgan sud deganda, ish yurituvida bo‘lgan fuqarolik, jinoyat ishlari bo‘yicha sudlar va ma'muriy hamda iqtisodiy sud tushuniladi.
 
Videokonferentsaloqa rejimidagi sud majlisini o‘tkazishga ko‘maklashadigan sud deganda, videokonferentsaloqa rejimidagi sud majlisini o‘tkazish uchun texnik va boshqa sharoitlarni ta'minlayotgan va ishni ko‘rayotgan sud hududidan tashqarida joylashgan iqtisodiy sud tushuniladi.
 
Videokonferentsaloqa rejimidagi sud majlisini o‘tkazishda ish O‘zbekiston Respublikasining Xo‘jalik protsessual, Fuqarolik protsessual va Jinoyat-protsessual kodekslarining umumiy qoidalariga muvofiq ko‘riladi.