Klinton Trampni irqchilikda aybladi

AQSh sobiq davlat kotibi Hillari Klinton mamlakat prezidenti Donald Trampning mojaroli so‘zlarini qoralab chiqdi. Tramp qonun chiqaruvchilar bilan uchrashuv davomida ba'zi mamlakatlardan Qo‘shma Shtatlarga kelayotgan migrantlarni «qo‘lansa joydan» chiqib kelganlar, deb atagan.

Klintonning fikriga ko‘ra, bunday bayonotlar irqchilikdir. Bu haqda u Twitter’dagi sahifasida yozdi.

Hillari Klintonning eslatishicha, prezidentning so‘zlari, jumladan Haitiga tegishli bo‘lgan joylari bu mamlakatda dahshatli zilzila sodir bo‘lgan kunda aytilgan. «Sakkiz yil avval ro‘y bergan bu dahshatli zilzila kunida Haiti xalqi bilan birdam bo‘lishimiz va Amerika qo‘shnilariga yordam ko‘rsatishga sodiqligini bildirishimiz kerak edi. Buning o‘rniga Trampning irqchilik kayfiyatidagi, haqoratli so‘zlariga to‘qnash keldik, ular uning o‘zi kabi tashqi qiyofaga ega bo‘lmagan barchaga qarshi qaratilgandi», - deya yozdi Klinton.

Donald Trampning so‘zlari irqchilik kayfiyatida bo‘lganini BMT devonida ham ma'lum qilishgan. «Mening xayolimga irqchilik so‘zidan boshqasi kelmayapti. AQSh o‘ziga yoqmaydigan alohida davlatlar va butunboshli qit'alarni, qora tanli shaxslarni qo‘lansa, deb atashiga yo‘l qo‘yib bo‘lmaydi», - degan BMTning inson huquqlari bo‘yicha Oliy komissari Boshqarmasi vakili Rupert Kolvill.

«Nega bizning mamlakatda o‘zining qo‘lansa davlatlaridan chiqib kelayotgan bu odamlar bor?» - degan Tramp qonun chiqaruvchilar bilan uchrashuv davomida. Taxminlarga ko‘ra, u Afrika mamlakatlari hamda Haitidan bo‘lgan migrantlarni nazarda tutgan. Uning so‘zlariga ko‘ra, AQSh Norvegiya kabi davlatlardan odamlarni jalb qilishi kerak.

Trampning o‘zi AQSh immigratsiya siyosatini tanqid qilishi vaqtida ba'zi davlatlardan keluvchi muhojirlar haqida qo‘pol so‘zlar aytmaganini ta'kidladi. “Men immigratsiya islohotiga bag‘ishlangan uchrashuvda qo‘llagan til keskin bo‘lgan. Biroq bu men qo‘llagan til emas”, - deb aytgan Tramp.