Matbuot va axborot agentligi samaradorligini Vazirlar Mahkamasi baholaydi

Vazirlar Mahkamasining 30.12.2017 yildagi 1038-son qarori bilan O‘zbekiston matbuot va axborot agentligi (O‘zMAA) to‘g‘risidagi nizom tasdiqlandi, deb yozmoqda Norma.uz.
 
Eslatib o‘tamiz, O‘zMAA tashkiliy tuzilmasi, markaziy apparatining tuzilmasi, shuningdek Qoraqalpog‘iston agentligi, viloyatlar va Toshkent shahar matbuot va axborot boshqarmalarining tuzilmalari prezidentning 17.08.2017 yildagi PQ–3223-son qarori bilan tasdiqlangan. 
 
Nizomda O‘zMAA va uning hududiy bo‘linmalari maqomi, asosiy vazifalari, funksiyalari, huquqlari, javobgarligi, faoliyatni amalga oshirish va hisobot topshirish tartibi, shuningdek uning rahbarlarining funksional majburiyatlari va javobgarligi belgilangan.
 
Agentlik tizimiga quyidagilar kiradi:

• Agentlik markaziy apparati va uning hududiy bo‘linmalari;
• G‘afur G‘ulom nomidagi, Cho‘lpon nomidagi, shuningdek «O'zbekiston» va «O'qituvchi» nashriyot-matbaa uylari;
• «O‘zbekiston milliy ensiklopediyasi» davlat ilmiy nashriyoti;
• Ko‘zi ojizlar bosmaxonasi (uning bazasida ko‘zi ojizlar uchun Brayl bo‘yicha turli adabiyotlar va matbaa mahsulotlari nashr etishga ixtisoslashgan nashriyot faoliyat yuritadi);
• Ma'muriy binolardan foydalanish boshqarmasi;
• Alisher Navoiy nomidagi O‘zbekiston milliy kutubxonasi.
 
Agentlik Vazirlar Mahkamasiga bo‘ysunadi va hisobot beradi. O‘zMAA faoliyati samaradorligi va natijadorligi yuzasidan muntazam baholab boriladi. Baholash mezonlari Hukumatning nazorat qiluvchi kompleksi rahbari tomonidan tasdiqlanadi.
 
Baholash yakunlariga ko‘ra quyidagi choralar qabul qilinadi:

• Agentlik rahbarlari va xodimlarini rag‘batlantirish (mukofotlash) yoki intizomiy javobgarlikka tortish;
• Agentlik faoliyatida aniqlangan kamchiliklarni bartaraf etish va uning ishini yanada takomillashtirish.
 
Ushbu hujjat 5.01.2018 yildan kuchga kirdi.