Bosh prokuratura Rashid Qodirov ishi doirasidagi boshqa hibsga olishlarni tasdiqlamadi

Toshkent shahri prokurorining korrupsiya va iqtisodiy jinoyatlar bo‘yicha sobiq o‘rinbosari Mirag‘lam Mirzayev hamda uning oila a'zolari qo‘lga olinmagan. Bu haqda OAVda tarqalgan ma'lumotlar Bosh prokuratura tomonidan rad etildi.

«Internet tarmog‘ida O‘zbekiston Respublikasi sobiq bosh prokurori R.Qodirovga nisbatan Bosh prokuratura tomonidan qo‘zg‘atilgan jinoyat ishi bo‘yicha Toshkent shahar prokurorining sobiq birinchi o‘rinbosari M.Mirzayev va uning oila a'zolari ushlanganligi to‘g‘risida xabar tarqatilgan. Bosh prokuratura ushbu ma'lumot haqiqatga muvofiq emasligini ma'lum qiladi», deyilgan O‘zbekiston Respublikasi Bosh prokuraturasi xabarida.

Bundan avvalroq OAVda Rashid Qodirov ko‘rsatmalaridan keyin adliya maslahatchisi Mirag‘lam Mirzayev, uning turmush o‘rtog‘i, «Yunusobod advokatlar kollegiyasi» rahbari Muhabbat Hasanova, ularning o‘g‘li, MXXning Toshkent shahar boshqarmasi huzuridagi Terrorizm va uyushgan jinoyatchilikka qarshi kurash bo‘linmasi sobiq boshlig‘i Abdurashid Mirzayev, Mirag‘lam Mirzayevning jiyani (Mir'azam Mirzayevning o‘g‘li), MXX Toshkent viloyat boshqarmasi huzuridagi Terrorizm va uuyushgan jinoyatchilikka qarshi kurash bo‘linmasi boshlig‘i Mansur Mirzayev qo‘lga olinib, ularga nisbatan jinoyat ishi ochilgani aytilgandi.

Mirag‘lam Mirzayev xalq orasida «Toshkentning temir prokurori» deya nom olgan. 

Eslatib o‘tamiz, 24 fevral kuni O‘zbekiston Respublikasining sobiq Bosh prokurori Rashid Qodirov O‘zbekiston Respublikasi Jinoyat-protsessual kodeksi 221-moddasi tartibida ushlanganligi haqida xabar berilgan edi. Qodirovga nisbatan «Tovlamachilik», «Hokimiyat yoki mansab vakolatini suiiste'mol qilish», «Pora olish» moddalari bo‘yicha jinoyat ishi ochilgan. Shuningdek, ushbu jinoyat ishi bo‘yicha bosh prokurorning sobiq o‘rinbosarlari hamda Toshkent viloyatining sobiq prokurorlari bo‘lmish Jamshid Fayziyev va Ulug‘bek Sunnatov ushlangan.